სერგეი ლავროვმა შეიძლება შეგაქოს კიდეც და ბევრი რამ ილაპარაკოს, მაგრამ ლავროვის განცხადებების იმედად ნუ იქნებით! - ლავროვის განცხადებები ნუ გაგიხარდებათ! – ასე უპასუხა “ქართული ოცნების“ დეპუტატმა ირაკლი ქადაგიშვილმა რუსეთის საგარეო საქმეთა მინისტრის განცხადების თაობაზე კითხვას, რომლის ვარაუდით, საქართველო უახლოეს პერიოდში „3+3“ ფორმატს შეუერთდება.

ქადაგიშვილის თქმით, ოპოზიცია მონდომებით ცდილობს, საქართველო რამენაირად “3+3 ფორმატს“ დააკავშიროს.

“სამი წელია საქართველოს ხელისუფლება მკაფიოდ ამბობს, რომ ჩვენ ამ ფორმატში მონაწილეობას არ ვიღებთ და არ მივიღებთ. ლავროვის განცხადება ეს არის ლავროვის განცხადება - მისი ინტერესის გამოხატვა ისე, რომ ქვეყნის შიგნით ოპოზიციას სალაპარაკო მისცეს. გინდათ, რომ ლავროვის პოზიციით ოპოზიციამ რაღაცნაირად პოლიტიკური ქულები მოიპოვოს - მაშინ გაყევით ლავროვის ამ ლოგიკას, მაგრამ საქართველოს ხელისფლება თავის ლოგიკას მიჰყვება, რომელიც ჭეშმარიტად ეროვნული ინტერესებით არის ნაკარნახევი“, - განაცხადა ირაკლი ქადაგიშვილმა.

სერგეი ლავროვის შეფასებით, “საქართველოს დღევანდელი ხელისუფლების ყველა მოქმედება ეროვნული ინტერესებიდან გამომდინარეობს“. მისივე განცხადებით, “ეს იმის დაჯერების შესაძლებლობას იძლევა, რომ უახლოეს მომავალში „3+3“ ფორმატი სრულფასოვნად შედგება“.