პარლამენტთან, აფხაზეთის დე ფაქტო ხელისუფლების მიერ დაკავებული საქართველოს მოქალაქის, ირაკლი ბებუას მხარდამჭერი აქცია გაიმართა.
პროტესტის მონაწილეები ხელისუფლებას ყველა სამართლებრივი გზის გამოყენებისა და ჩვენი ქვეყნის მოქალაქის, საქართველოს კონტროლირებად ტერიტორიაზე უსაფრთხოდ დაბრუნებისაკენ მოუწოდებენ.
საოკუპაციო რეჟიმის ყოფილი პატიმარი, ექიმი ვაჟა გაფრინდაშვილი მის მსგავსად, რუსეთის ტყვეობიდან გათავისუფლებულ ადამიანებს მიმართავს და ამბობს, რომ ირაკლი ბებუას ოკუპანტი სახელმწიფოსაგან დახსნაში მათ აქტიურობას დიდი მნიშვნელობა ენიჭება.
„ირაკლი ბებუას გათავისუფლების ყველაზე დიდი ძალა არის საზოგადოება. თუ საზოგადოება ჩვენ მთავრობას მოსთხოვს ირაკლი ბებუას გათავისუფლებაზე უფრო აქტიურ მოქმედებას, ჩაათვალეთ, რომ ორ თვეში ირაკლი გათავისუფლებული იქნება. საკუთარ თავზე მაქვს გამოცდილი და ვიცი, რომ ყოველ გამოსვლაზე, რაც თბილისში ხდებოდა, ბადრაგის საშუალებით მომდიოდა ინფორმაცია, რომ აი, დღეს შენზე ილაპარაკეს, გუშინ შენზე ილაპარაკეს... ნათქვამი ერთი სიტყვაც კი, ათჯერ აძლიერებს ირაკლის. ამიტომაც ვთხოვ საზოგადოებას, ოჯახს აქტიურად დაუდგეს მხარში, რომ რაც შეიძლება მალე გათავისუფლეს ირაკლი. ასევე მინდა, მოვუწოდო საქართველოს დაახლოებით, 4 ათას მოქალაქეს, რომელიც დაკავებული და რუსეთის ოკუპაციის მსხვერპლი იყო, თბილისში თუ არა, სადაც არიან, თავიანთ სოფლებში გამოვიდნენ და მხარი დაუჭირონ საქართველოს ყველა მოქალაქეს, რომელიც დღეს დაკავებულია“, - განაცხადა ვაჟა გაფრინდაშვილმა.
ცნობისთვის, ირაკლი ბებუა დე ფაქტო სასამართლომ „სახელმწიფო სიმბოლიკის შეურაცხყოფის", „სხვისი ქონების განზრახ დაზიანების" და „საბრძოლო მასალის უკანონოდ შენახვის" მუხლებით გაასამართლა. მას 2020 წლის 7 დეკემბერს 9 წლით თავისუფლების აღკვეთა მიესაჯა.
