რუსეთის თავდაცვის სამინისტროს ინფორმაციით, რუსეთში „საპასუხო ბირთვული დარტყმის მასიური წვრთნა“ ჩაატარეს
რუსეთში „საპასუხო ბირთვული დარტყმის მასიური წვრთნა“ ჩაატარეს. ამის შესახებ ინფორმაციას რუსეთის თავდაცვის სამინისტრო ავრცელებს.
მათი ცნობით, რუსეთის თავდაცვის მინისტრმა სერგეი შოიგუმ რუსეთის პრეზიდენტ ვლადიმირ პუტინს შეატყობინა, რომ “სტრატეგიული თავდასხმითი ძალების მიერ შესრულებულია მოწინააღმდეგის ბირთვულ დარტყმაზე საპასუხო მასიური ბირთვული დარტყმის ამოცანა“.
კრემლმა მოგვიანებით გაავრცელა ინფორმაცია, რომ ბირთვული შემაკავებელი ძალების შემადგენელი სახმელეთო, საზღვაო და საავიაციო საშუალებების მიერ წვრთნების ფარგლებში შედგა ბალისტიკური და ფრთოსანი რაკეტების პრაქტიკული გაშვება.
რუსეთის თავდაცვის სამინისტრო რაკეტების გაშვების ვიდეოს აქვეყნებს. კერძოდ, “პლესეცკის” კოსმოდრომიდან კამჩატკის კურას პოლიგონზე კონტინენტთაშორისი ბალისტიკური რაკეტა “იარსი” გაუშვეს.
ასევე, ბარენცის ზღვის აკვატორიიდან წყალქვეშა ბირთვული სარაკეტო კრეისერიდან “ტულა” ბალისტიკური რაკეტა “სინევა” გაუშვეს.
