სამხრეთ კორეა, იაპონია და შეერთებული შტატები მკაცრად გმობენ ჩრდილოეთ კორეის მიერ რუსეთისთვის იარაღისა და სამხედრო აღჭურვილობის მიწოდებას და აცხადებენ, რომ მათ იარაღის რამდენიმე მიწოდება დაადასტურეს, - ამის შესახებ სამი ქვეყნის საგარეო საქმეთა მინისტრების მიერ გავრცელებულ ერთობლივ განცხადებაშია აღნიშნული.

„კორეის რესპუბლიკა, შეერთებული შტატები და იაპონია მკაცრად გმობენ კორეის სახალხო დემოკრატიული რესპუბლიკის მიერ სამხედრო აღჭურვილობისა და საბრძოლო მასალის რუსეთის ფედერაციისთვის მიწოდებას უკრაინის მთავრობისა და ხალხის წინააღმდეგ გამოსაყენებლად. იარაღის ასეთი მიწოდება, რომელთაგან რამდენიმეს ჩვენ ახლა ვადასტურებთ, რომ დასრულებულია, მნიშვნელოვნად გაზრდის რუსეთის აგრესიული ომის ადამიანურ დანაკარგებს“, - ნათქვამია განცხადებაში.

სამხრეთ კორეა, იაპონია და შეერთებული შტატები აცხადებენ, რომ ყურადღებით აკვირდებიან ასევე რუსეთის მიერ ჩრდილოეთ კორეისთვის ნებისმიერი მასალის მიწოდების ფაქტს.

„ჩვენ ყურადღებით ვაკვირდებით ნებისმიერ მასალას, რომელსაც რუსეთი აწვდის კორეის სახალხო დემოკრატიულ რესპუბლიკას ფხენიანის სამხედრო მიზნების მხარდასაჭერად“, - აცხადებენ სამი ქვეყნის საგარეო საქმეთა მინისტრები და დასძენენ, რომ ჩრდილოეთ კორეასთან იარაღის მიწოდებასთან დაკავშირებული ნებისმიერი გარიგება არღვევს გაერო-ს უშიშროების საბჭოს რამდენიმე რეზოლუციას, რომელსაც თავად მოსკოვმა დაუჭირა მხარი.