ევროკავშირის ელჩის განცხადება „მაუწყებლობის შესახებ“ კანონზე მკაფიო არ იყო - შედეგით არის კმაყოფილი თუ ზოგადად ის მოსწონს, რომ პროცესი დაიწყო და დისკუსია გაიხსნა, ეს ორაზროვნება მინდა აღმოფხვრას, - ამის შესახებ „გირჩის“ დეპუტატმა სანდრო რაქვიაშვილმა განაცხადა.

როგორც მან აღნიშნა, ეცდება, ევროპელი დიპლომატებისგან ამ კითხვებზე პასუხი მიიღოს.

„ვაპირებ კომუნიკაცია მქონდეს ევროპელ დიპლომატებთან, რადგან ეს ვერ გავიგე, რას ნიშნავს. ინტერპრეტაციაა შესაძლებელი, რადგან ერთია, რომ შეიძლება პროცესი იყო მუშაობის, მაგრამ შედეგით არის კმაყოფილი? მე სიტყვის თავისუფლებას ნებისმიერი დიპლომატის ან სხვა მთავრობის პოზიციაზე უფრო მაღლა ვაყენებ, რა თქმა, უნდა მაინტერესებს რას ამბობს ელჩი, მაგრამ არ ვაპირებ ჩემი პოზიციის ცვლილებას, რომ „კარგი, სიტყვის თავისუფლება შევზღუდოთ, რადგან დიპლომატმა ასე თქვა“. თვითონ განცხადება არ იყო მკაფიო, ერთია პროცესით იყო კმაყოფილი და მეორე შედეგით. შედეგი მისი ინიციატივა იყო, მან გვითხრა, რომ ასე უნდა გაკეთებულიყო და ამიტომ არის კმაყოფილი, თუ ზოგადად ის მოსწონს, რომ პროცესი დაიწყო და დისკუსია გაიხსნა. ეს ორაზროვნება მინდა აღმოიფხვრას და ვეცდები, ევროპელი დიპლომატებისგან პასუხი მივიღო”, - განაცხადა რაქვიაშვილმა.

საქართველოში ევროკავშირის ელჩის, პაველ ჰერჩინსკის განცხადებით, საქართველოსთვის კანდიდატის სტატუსის მინიჭების მიმართულებით ბევრი რამ გაკეთდა, თუმცა „წელიწად ნახევარში უფრო მეტის გაკეთება შეიძლებოდა“.

ჰერჩინსკიმ დაასახელა ის მიმართულებები, სადაც ნაბიჯები კვლავ გადასადგმელია, მათ შორის, დეპოლარიზაცია და დეოლიგარქიზაცია.

მისივე თქმით, ჯოზეფ ბორელის ვიზიტის შემდეგ, ბევრ პოზიტიურ განვითარებას ჰქონდა ადგილი. მათ შორის „მაუწყებლობის შესახებ“ კანონზე მუშაობა და ურთიერთგაგების მემორანდუმი, რომელიც რამდენიმე სამოქალაქო საზოგადოებასთან გაფორმდა.