გურამ გურამიშვილმა რუმინელ კოლეგასთან შავი ზღვა - კასპიის ზღვის სატრანსპორტო დერეფნის ჩამოყალიბების შესახებ ოთხმხრივი შეთანხმების გაფორმების საკითხი განიხილა
საქართველოს ეკონომიკისა და მდგრადი განვითარების მინისტრის მოადგილე გურამ გურამიშვილი რუმინეთის ტრანსპორტისა და ინფრასტრუქტურის სამინისტროს სახელმწიფო მდივანს, ადრიან ფოგის შეხვდა და მასთან შავი ზღვა - კასპიის ზღვის სატრანსპორტო დერეფნის ჩამოყალიბების შესახებ ოთხმხრივი შეთანხმების გაფორმების საკითხი განიხილა. ინფორმაციას ეკონომიკისა და მდგრადი განვითარების სამინისტრო ავრცელებს.
მათივე ცნობით, შეხვედრა თბილისის აბრეშუმის გზის ფორუმის ფარგლებში გაიმართა.
„შეხვედრაზე განსაკუთრებული ყურადღება ორმხრივი და რეგიონული თანამშრომლობის გაძლიერების ფარგლებში, შავი ზღვა - კასპიის ზღვის სატრანსპორტო დერეფნის გააქტიურებაზე გამახვილდა. მინისტრის მოადგილემ რეგიონულ სატრანსპორტო-ლოგისტიკურ პროცესებში რუმინეთის მნიშვნელობას ხაზი გაუსვა. მისი თქმით, რუმინეთს, როგორც საზღვაო მიმართულებით ევროკავშირის მომიჯნავე ქვეყანას, ევროკავშირთან ჩვენი ქვეყნის დაკავშირებადობის კუთხით უდიდესი მნიშვნელობა ენიჭება.
საუბარი შეეხო საქართველოსა და რუმინეთს შორის შავ ზღვაზე საზღვაო-საბორნე მიმოსვლის ინტენსივობის გაზრდას, საავტომობილო ტრანსპორტის სფეროში თანამშრომლობის გაღრმავებას, აგრეთვე, შავი ზღვის ბოჭკოვანი კაბელის პროექტს და სხვ.
დასასრულს, მხარეები შეთანხმდნენ, რომ პრიორიტეტული მიმართულებების გაღრმავების მიზნით თანამშრომლობას გააგრძელებენ“, - აღნიშნულია გავრცელებულ ინფორმაციაში.
v-if="article.gallery" v-html="article.gallery"
