ბოლივიის ხელისუფლება ისრაელთან დიპლომატიურ ურთიერთობებს წყვეტს და მიზეზად იმას ასახელებს, რომ „პალესტინელი ხალხის წინააღმდეგ ჩადენილი დანაშაულები კაცობრიობის წინააღმდეგ ჩადენილი დანაშაულებია“, - ინფორმაციას CNN-ი ადგილობრივ მედიაზე დაყრდნობით ავრცელებს.

მათივე ინფორმაციით, ბოლივია ასევე ემზადება ღაზაში ჰუმანიტარული დახმარების გასაგზავნად.

ბოლივიის წარმომადგენელმა გაერო-ში, დიეგო პარიმ სამშაბათს, გაერო-ს გენერალური ასამბლეის საგანგებო სხდომაზე თავისი ქვეყნის პოზიცია კიდევ ერთხელ დაადასტურა და განაცხადა, რომ მხარს უჭერენ პალესტინელი ხალხის უფლებებს.

„შედეგად, ბოლივიელმა ხალხმა და მთავრობამ მიიღეს გადაწყვეტილება, გაწყვიტონ დიპლომატიური ურთიერთობები ისრაელის სახელმწიფოსთან, რადგან ჩვენ მას მივიჩნევთ სახელმწიფოდ, რომელიც არ სცემს პატივს ადამიანთა სიცოცხლეს, საერთაშორისო კანონს ან საერთაშორისო ჰუმანიტარულ სამართალს“,- აღნიშნა პარიმ.