სუს-ის წარმომადგენელი - ერთადერთი, რა უკუკავშირიც იყო ისაა, რომ აწარმოებენ ე.წ. გამოძიებას და დამნაშავეები დაისჯებიან - უკანონო დაკავებულთან დაკავშირებით გვითხრეს, რომ არ არის დაჭრილი

ერთადერთი რა უკუკავშირიც იქიდან იყო არის ის, რომ ისინი აწარმოებენ ე.წ. გამოძიებას და დამნაშავეები დაისჯებიან , - ამის შესახებ სახელმწიფო უსაფრთხოების სამსახურის საინფორმაციო-ანალიტიკური სამსახურის დირექტორის მოადგილემ, ირაკლი ანთაძემ, ერგნეთში გამართული შეხვედრის შემდეგ განაცხადა.

ირაკლი ანთაძის თქმით, დღევანდელმა ინციდენტმა კიდევ ერთხელ წარმოაჩინა ის ანტიჰუმანური ხასიათი, რაც ზოგადად ოკუპაციას აქვს.

„მთავარი მოთხოვნა, რა თქმა უნდა, არის დამნაშავის დასჯა, მაგრამ უმთავრესი დღევანდელი სიტუაციიდან გამომდინარე არის, უკანონო პატიმრობაში მყოფი მეორე პირის დაბრუნება, ვინაიდან დავრწმუნდეთ, რომ მას არ აქვს დაზიანებები.

უკანონო დაკავებულთან დაკავშირებით გვითხრეს, რომ არ არის დაჭრილი და მას არ აქვს ფიზიკური დაზიანება, თუმცა ჩვენ მოვითხოვეთ და ველოდებით, რომ იგი დავაბრუნოთ ცენტრალური ხელისუფლების მიერ კონტროლირებად ტერიტორიაზე.

დღევანდელმა ინციდენტმა კიდევ ერთხელ წარმოაჩინა ის ანტიჰუმანური ხასიათი, რაც ზოგადად ოკუპაციას აქვს და რუსეთის საოკუპაციო ძალების საქართველოს ოკუპირებულ ტერიტორიებზე ყოფნას“, - განაცხადა ირაკლი ანთაძემ.

ასევე, ირაკლი ანთაძის მტკიცებით, ამ დროისთვის ადგილობრივი მოსახლეობის უსაფრთხოებას, უზრუნველყოფენ საპოლიციო ძალები.

ცნობისთვის, სოფელ კირბალის მიმდებარედ რუსეთის საოკუპაციო ძალებმა ცეცხლსასროლი იარაღით სროლის შედეგად საქართველოს მოქალაქე მოკლეს. საქართველოს სახელმწიფო უსაფრთხოების სამსახური მომხდარზე განცხადებას ავრცელებს და აცხადებს, რომ რუსეთის საოკუპაციო ძალებმა უკანონოდ დააკავეს საქართველოს კიდევ ერთი მოქალაქე.

“2023 წლის 6 ნოემბერს გორის მუნიციპალიტეტის სოფელ კირბალის მიმდებარედ, ოკუპირებულ ტერიტორიაზე, ადგილობრივი მცხოვრების უკანონოდ დაკავების მცდელობისას რუსეთის საოკუპაციო ძალების მიერ ცეცხლსასროლი იარაღით სროლის შედეგად გარდაიცვალა საქართველოს მოქალაქე და უკანონოდ დაკავებულ იქნა ერთი მოქალაქე.

მიმდინარეობს აქტიური კომუნიკაცია საქართველოს ცენტრალური ხელისუფლების ხელთ არსებული ყველა ინსტრუმენტის გამოყენებით”, - ნათქვამია ინფორმაციაში, რომელსაც სუს-ი ავრცელებს.

შსს-მ გორის მუნიციპალიტეტის სოფელ კირბალთან, რუსეთის საოკუპაციო ძალის წარმომადგენლის მიერ ცეცხლსასროლი იარაღიდან გასროლის შედეგად საქართველოს მოქალაქის მკვლელობის და ერთი პირის გატაცების ფაქტებთან დაკავშირებით გამოძიება სისხლის სამართლის კოდექსის 109-ე და 143-ე მუხლებით დაიწყო, რაც განზრახ მკვლელობას და თავისუფლების უკანონო აღკვეთას გულისხმობს.