ევროპის სტაბილურობისა და კეთილდღეობის მისაღწევად ძირითად ინსტრუმენტად გაფართოების პოლიტიკა რჩება და ჩვენ არ გვაქვს უფლება გავიმეოროთ შეცდომები და დავტოვოთ ჩვენი პარტნიორები ნაცრისფერ ზონებში, - ამის შესახებ ევროპარლამენტარი, ანა ფოტიგა სოციალურ ქსელში წერს.

„ვიმედოვნებ, რომ 2023 წლის გაფართოების პაკეტი გაითვალისწინებს ამ უმნიშვნელოვანეს ფაქტს იმ ქვეყნების პოლიტიკური და ეკონომიკური პირობების შეფასებისას, რომლებიც ისწრაფვიან ჩვენს საზოგადოებაში გაწევრიანებისკენ“, - აცხადებს ევროპარლამენტარი.

მისი თქმით, ევროკავშირმა საქართველოსთვის კარი არ უნდა დახუროს, მიუხედავად იმისა, რომ ქვეყნის მმართველმა პარტიამ, ბოლო დროს, გარკვეული „შემაშფოთებელი ნაბიჯები“ გადადგა.

„დიდი ყურადღებით ვაკვირდები დასავლეთ ბალკანეთსა და თურქეთში არსებულ ვითარებას. ვაფასებ უკრაინისა და მოლდოვის მიერ მიღწეულ პროგრესს, მიუხედავად უჩვეულო გარემოებებისა და პირობებისა. ჩვენ არ შეგვიძლია დავუხუროთ ევროკავშირის კარი საქართველოს, ევროკავშირისკენ მიმავალ გზაზე მის მიერ გადადგმული ნაბიჯების შეფასებისას, მიუხედავად მმართველი პარტიის მიერ ბოლო დროს გადადგმული ზოგიერთი შემაშფოთებელი ნაბიჯებისა“, - აცხადებს ევროპარლამენტარი.