კიდევ ერთხელ გამოჩნდა, რომ ნამდვილი მეგობრები გასაჭირში მყოფ მეგობრებს არ ტოვებენ, - ამის შესახებ საქართველოს პარლამენტის ოპოზიციონერმა დეპუტატმა, თეონა აქუბარდიამ „პალიტრანიუსის” გადაცემა „რეზიუმეში“ განაცხადა, რითაც ევროკომისიის მიერ საქართველოსთვის კანდიდატის სტატუსის მინიჭების რეკომენდაციის გაცემას გამოეხმაურა.

თეონა აქუბარდიას თქმით, ეს არის ქვეყნის მეგობრების დამსახურება ევროკავშირში, რადგან მათ საქართველოს ხელი არ გაუშვეს.

„გულწრფელად ვულოცავ სრულიად საქართველოს ამ გადაწყვეტილებას, რადგან კიდევ ერთხელ გამოჩნდა ქართველი ხალხის დამსახურება, რასაც ხაზი გაუსვა ევროკომისიის პრეზიდენტმა. ხალხი რომ არ ყოფილიყო, ჩვენ არ გვექნებოდა ეს შესაძლებლობა. კიდევ ერთხელ გამოჩნდა, რომ ნამდვილი მეგობრები გასაჭირში მყოფ მეგობრებს არ ტოვებენ. ეს არის ჩვენი მეგობრების დამსახურება ევროკავშირში, რომ საქართველოს ხელი არ გაუშვეს. დაგვპირდნენ კიდეც და დგანან საქართველოსთან ერთად, მიუხედავად იმისა, რომ 12 რეკომენდაცია არ არის სრულფასოვნად შესრულებული, საგარეო პოლიტიკასთან თანხვედრა არ არის საკმარისი. დეზინფორმაციასთან ბრძოლა და არჩევნებთან დაკავშირებით ახალი დავალებაა“, - განაცხადა თეონა აქუბარდიამ.

ამასთან, თეონა აქუბარდიას თქმით, ევროკომისიის გადაწყვეტილება ხელისუფლების დამსახურება რომ არ არის, ამაზე ისიც მეტყველებს, რომ კიდევ 9 დამატებითი წინაპირობა აქვს ქვეყანას შესასრულებელი.

„ჩვენ გვითხრეს, რომ ხალხის და ჩვენ ვამბობთ, რომ ხალხის დამსახურებაა. ხელისუფლების დამსახურება რომ არ არის, ამიტომ გვაქვს კიდევ 9 დამატებითი წინაპირობა. „მეორე ფრონტი“, „გლობალური ომის“ პარტია - ათასგვარ სისულელეს გეუბნებოდნენ. გვეუბნებოდნენ, რომ დასავლეთ საქართველოს ომში ჩართვა უნდოდა და ამერიკა აქ არჩევნებში ერეოდა, მაგრამ დღეს მე მოვისმინე პრემიერისგან მადლობა აშშ-ზე, რომ ის შეხვდა სალივანს. როგორც ჩანს, დარწმუნდა ირაკლი ღარიბაშვილი, რომ ამერიკა აქ გადატრიალებას და რევოლუციას არ გეგმავს. პრემიერი დღეს რომ ამბობს, რომ „მადლობა ამერიკას“, მე გულწრფელად მიხარია და იმედი მაქვს, რომ დეკემბრის ბოლომდე მაინც გაჰყვებათ ეს სამადლობელი სიტყვები და აღარ იქნება ის პროპაგანდა და დეზინფორმაცია“, - განაცხადა თეონა აქუბარდიამ.