ირანი აცხადებს, რომ „ჰამასის“ წინააღმდეგ ისრაელის ომის შედეგად მშვიდობიანი მოსახლეობის მიმართ მიყენებული ზიანის მასშტაბები აუცილებლად გამოიწვევს კონფლიქტის გაფართოებას, -ამის შესახებ ინფორმაციას Reuters-ი ირანულ მედიაზე დაყრდნობით ავრცელებს.

„ღაზას მშვიდობიანი მოსახლეობის წინააღმდეგ ომის ინტენსივობის გაზრდის გამო, ომის ფარგლების გაფართოება გარდაუვალი გახდა“, - განაცხადა ირანის საგარეო საქმეთა მინისტრმა, ამირ-აბდოლაჰიანმა კატარელ კოლეგასთან, შეიხ მუჰამედ ბინ აბდულრაჰმან ალ თანისთან საუბარში.

ირანი მხარს უჭერს „ჰამასს“, მაგრამ აცხადებს, რომ მას ისრაელზე 7 ოქტომბერს განხორციელებულ თავდასხმაში მონაწილეობა არ მიუღია. ირანი ასევე მხარს უჭერს „ჰეზბოლას“, ლიბანურ დაჯგუფებას, რომელსაც „ჰამასთან“ და „ისლამურ ჯიჰადთან“ მნიშვნელოვანი კავშირები აქვს.