პენიტენციურმა სამსახურმა უნდა უზრუნველყოს სუიციდის პრევენციის პროგრამის ნაკლოვანებების აღმოფხვრა, - ამის შესახებ სპეციალური საგამოძიებო სამსახურის ანგარიშშია საუბარი, რომელიც უწყების ხელმძღვანელმა პარლამენტში, კომიტეტის სხდომაზე წარადგინა.

უწყების ცნობით, პროგრამის მიზანს სუიციდისკენ მიდრეკილ ბრალდებულთა/მსჯავრდებულთა გამოვლენა და სუიციდით გამოწვეული სიკვდილიანობის შემცირება წარმოადგენს. ამდენად, მათივე განმარტებით, ძალიან მნიშვნელოვანია, დროულად მოხდეს სუიციდის რისკის მატარებელი პირების იდენტიფიცირება და მათი პროგრამაში ჩართვა.

„მიზანშეწონილია, პროგრამით განსაზღვრული მიზნის შესასრულებლად - სუიციდის რისკის მქონე ბრალდებულთა/მსჯავრდებულთა იდენტიფიცირება და სუიციდით გამოწვეული სიკვდილიანობის შემცირება, დაიხვეწოს სუიციდის რისკის მიმოხილვითი შეფასებისას ქულების მინიჭების სქემა, რათა არ მოხდეს ისეთი პატიმრებისთვის დაბალი რისკის განსაზღვრა (რაც ნიშნავს პატიმრის დარჩენას სუიციდის პრევენციის პროგრამის მიღმა), რომლებიც ობიექტურად არიან საშუალო ან/და მაღალი რისკის მატარებელნი”, - ნათქვამია ანგარიშში.

ანგარიშში დადებითად არის შეფასებული პენიტენციური სამსახურის მიერ გამოჩენილი თანამშრომლობის მზაობა.

როგორც მასშია აღნიშნული, ციხეში პატიმართა გარდაცვალების ფაქტებზე, პენიტენციურმა დაწესებულებამ საგამოძიებო ორგანოს ყველა შემთხვევაში ოპერატიულად მიაწოდა ვიდეო სამეთვალყურეო ჩანაწერები, რასაც საფუძვლად დაედო სისხლისსამართლებრივი დევნის დაწყება და მოხდა შემთხვევის ობიექტურად შეფასება.