ლონდონში ულტრა-მემარჯვენე მომიტინგეები, პალესტინის მხარდამჭერთა მსვლელობის წინ, პოლიციას დაუპირისპირდნენ.

ამის შესახებ ინფორმაციას Sky News-ი ავრცელებს.

„მიუხედავად იმისა, რომ უაითჰოლში ორწუთიანი დუმილი პატივისცემითა და ინციდენტების გარეშე აღინიშნა, ოფიცრები მსვლელობის მოწინააღმდეგეთა მხრიდან აგრესიას შეხვდნენ, რომლებიც ადგილზე დიდი რაოდენობით იმყოფებიან“, - ნათქვამია ლონდონის პოლიციის განცხადებაში.

სოციალურ მედიაში გავრცელებული კადრების მიხედვით, ულტრა-მემარჯვენე მომიტინგეები შეკრებილი ხალხისა და პოლიციის მიმართულებით სკანდირებდნენ „ინგლისი სიკვდილამდე“ და „თქვენ ინგლისელები აღარ ხართ“.

ლონდონის პოლიციის ცნობით, ერთ-ერთი პირი, რომელიც უაითჰოლის ტერიტორიაზე ცივი იარაღით გადაადგილდებოდა, დაკავებულია.