საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ) თავმჯდომარემ, თბილისის სახელმწიფო უნივერსიტეტის პროფესორმა დავით ნარმანიამ დავით აღმაშენებლის სახელობის საქართველოს ეროვნული თავდაცვის აკადემიის იუნკრებისთვის სემეკის საქმიანობის შესახებ ლექცია წაიკითხა. დავით ნარმანიამ მათ ენერგეტიკისა და წყალმომარაგების სექტორების ფუნქციონირებაში მარეგულირებელი კომისიის როლი გააცნო. აღნიშნულის შესახებ ინფორმაციას სემეკი ავრცელებს.

მათივე ცნობით, დავით ნარმანიამ მონაწილეებს რეგულირებას დაქვემდებარებული კომპანიების ვალდებულებებისა და ელექტროენერგიის, ბუნებრივი გაზის, წყალმომარაგების მომხმარებელთა უფლებების შესახებ დეტალური ინფორმაცია მიაწოდა.

„ლექციის ფარგლებში იუნკრებმა სემეკის მიერ 2022-2023 წლებში განხორციელებული პროექტები და საქართველოს ენერგეტიკის სექტორის განვითარების პერსპექტივები მოისმინეს.

დავით აღმაშენებლის სახელობის საქართველოს ეროვნული თავდაცვის აკადემია ამიერკავკასიაში ერთ-ერთი წამყვანი უმაღლესი სამხედრო დაწესებულებაა, რომელიც თანამედროვე მეთოდებით, თეორიული და პრაქტიკული ცოდნით აღჭურვილი, კონკურენტუნარიანი ოფიცრების მომზადებას უზრუნველყოფს“,- აღნიშნულია ინფორმაციაში.