აშშ-მა ღაზაში სისასტიკის შესაჩერებლად მეტი უნდა გააკეთოს, - ამის შესახებ ინდონეზიის პრეზიდენტმა, ჯოკო ვიდოდომ თეთრ სახლში ვიზიტისას განაცხადა.
„ინდონეზია მოუწოდებს აშშ-ს ღაზაში სისასტიკის შესაჩერებლად მეტი გააკეთოს. ცეცხლის შეწყვეტა კაცობრიობისთვის აუცილებელია“, - განუცხადა ვიდოდომ ბაიდენს.
თეთრი სახლის ცნობით, აშშ და ინდონეზია თავდაცვის სფეროებში თანამშრომლობის ახალ ფორმებზე შეთანხმდნენ, მათ შორის კიბერუსაფრთხოების, კოსმოსის, კომბინირებული წვრთნებისა და ბირთვული საფრთხეების შესახებ.
რაც შეეხება კლიმატს, ორი სახელმწიფოს პრეზიდენტი შეთანხმდა, რომ ჰაერის ხარისხის გაუმჯობესების მიმართულებით იმუშავებენ.
ჯო ბაიდენისა და ინდონეზიის პრეზიდენტის შეხვედრა თეთრ სახლში აზია-წყნარი ოკეანის ეკონომიკური თანამშრომლობის სამიტის წინ გაიმართა.
გავრცელებული ინფორმაციით, ჯო ბაიდენი ოთხშაბათს სან-ფრანცისკოში, ჩინეთის პრეზიდენტს, სი ძინპინს შეხვდება.
