უკრაინის დაზვერვის მთავარი სამმართველოს ხელმძღვანელი, კირილ ბუდანოვი აცხადებს, რომ რუსეთი უკრაინასა და დასავლეთთან მოლაპარაკებას კიდევ დიდხანს არ გამართავს.

მისი მტკიცებით, ომი შეიძლება დიდხანს გაგრძელდეს, რადგან რუსები არ მოაწერენ ხელს არანაირ შეთანხმებას უკრაინასთან და გააგრძელებენ ქაოტურ დაბომბვას, მაგრამ ინტენსიური საომარი მოქმედებების გარეშე.

ბუდანოვი განმარტავს, რომ ისტორიამ იცის მაგალითები, როდესაც ომები იურიდიულად არ დასრულებულა, მაგალითად, იაპონია და რუსეთი, რომლებიც ოფიციალურად ომში არიან 1945 წლიდან, რადგან კურილის კუნძულების სტატუსის შესახებ სამშვიდობო ხელშეკრულება არ გაფორმებულა.

„ეს ტერიტორიული პრობლემა უკვე 70 წელზე მეტია არსებობს, ამიტომ, ეს სცენარი აქაც ძალიან სავარაუდოა, რადგან რუსეთის ფედერაციას აქვს მნიშვნელოვანი ტერიტორიული მადა უკრაინასთან მიმართებაში, რაც მხოლოდ ყირიმს არ ეხება. რა თქმა უნდა, არავინ აპირებს ამ მადის დაკმაყოფილებას“, - განაცხადა ბუდანოვმა.