საფრანგეთის თავდაცვის მინისტრი 2000 წლის შემდეგ პირველად, ისრაელს ეწვევა, - ამის შესახებ ინფორმაციას საფრანგეთის თავდაცვის მინისტრი, სებასტიენ ლეკორნუ ავრცელებს.

„ეს მოგზაურობა ეგვიპტეში დაიწყება და პარასკევს ისრაელში დასრულდება, საფრანგეთის თავდაცვის მინისტრი ისრაელს 2000 წლის შემდეგ პირველად ეწვევა“, - წერს ლეკორნუ „ტვიტერის“ გვერდზე.

ვიზიტის დაანონსებისას, სებასტიენ ლეკორნუმ აღნიშნა, რომ ისრაელში შეხვედრების დროს ღაზაში არსებულ ვითარებას და რეგიონალური უსაფრთხოების საკითხებს განიხილავს, მაგრამ არ დააკონკრეტა, თუ ვისთან გამართავს მოლაპარაკებებს.

ცნობისთვის, გუშინ საფრანგეთის პრემიერ-მინისტრმა ელიზაბეტ ბორნმა განაცხადა, რომ ქვეყანა ღაზაში ჰუმანიტარულ პაუზას მოითხოვს.