ევროკავშირის ინსტიტუციურმა რეფორმებმა მისი გაფართოება არ უნდა შეანელოს, - ამის შესახებ ლიეტუვის პრეზიდენტმა, გიტანას ნაუსედამ განაცხადა.

„ევროკავშირის გაფართოების პროცესის გეოპოლიტიკური მნიშვნელობიდან გამომდინარე, ჯერ გადაწყვეტილება ევროკავშირის გაფართოებაზე უნდა მივიღოთ, შემდეგ კი ვისაუბროთ მის ინსტიტუციურ რეფორმებზე“, - განაცხადა ნაუსედამ.

ნაუსედამ აღნიშნა, რომ ევროკომისიის რეკომენდაცია უკრაინასა და მოლდოვასთან ევროკავშირში გაწევრიანების მოლაპარაკებების დაწყების, ასევე საქართველოსთვის კანდიდატი ქვეყნის სტატუსის მინიჭების შესახებ, წინ გადადგმული მნიშვნელოვანი ნაბიჯია.

„ევროკავშირის გაფართოება არის კონტინენტის გაერთიანებისა და გაძლიერების შესაძლებლობა. ევროკავშირის გაფართოების წარმატებული ახალი ეტაპი, 2004 წლის შემდეგ, შიდა ბაზრის უდიდეს ზრდას გამოიწვევს“, - აღნიშნა ლიეტუვის პრეზიდენტმა.