გიორგი ვაშაძემ და თინა ბოკუჩავამ ევროინტეგრაციის საკითხთან დაკავშირებით ბრიუსელში პეტრას ასტრევიჩუსთან შეხვედრა გამართეს
პარტიის „სტრატეგია აღმაშენებელი“ თავმჯდომარე, გიორგი ვაშაძე და საპარლამენტო ფრაქციის „ერთიანი ნაციონალური მოძრაობა“ თავმჯდომარე, თინა ბოკუჩავა ბრიუსელში საქართველოს მტკიცე მხარდამჭერს, ევროპარლამენტარ, პეტრას ასტრევიჩუსს შეხვდნენ. ამის შესახებ ინფორმაციას „სტრატეგია აღმაშენებლის“ ავრცელებს.
პარტიის ინფორმაციით, შეხვედრაზე საქართველო - ევროკავშირის ურთიერთობები განიხილეს.
“საუბრისას, ევროპარლამენტარმა, პეტრას ასტრევიჩუსმა საქართველოს ევროპულ და ევროატლანტიკურ გზაზე მხარდაჭერა კიდევ ერთხელ გამოუცხადა და აღნიშნა, რომ ევროპარლამენტში საქართველოს არაერთი მეგობარი და მხარდამჭერი ჰყავს.
საქართველოდან ჩასული ოპოზიციონერი ლიდერები ბრიუსელში ევროპარლამენტარებთან შეხვედრებს მიმდინარე კვირის განმავლობაში კვლავ განაგრძობენ“, - ნათქვამია „სტრატეგია აღმაშენებლის“ პრესსამსახურის მიერ გავრცელებულ ინფორმაციაში.
