ღაზას ალ-შიფას საავადმყოფოში განხორციელებული ოპერაციის დროს სამედიცინო მარაგი მივიტანეთ, - ამის შესახებ ინფორმაციას ისრაელის თავდაცვის ძალები ავრცელებს.

„ახალშობილთა ინკუბატორები, ბავშვთა საკვები და სამედიცინო მარაგი ალ-შიფაში მივიტანეთ. სამედიცინო ჯგუფები და არაბულენოვანი ჯარისკაცები ადგილზე იმყოფებიან, რათა უზრუნველყონ, რომ აღნიშნული მარაგი დანიშნულების ადგილამდე მიაღწევს“, - ნათქვამია ისრაელის თავდაცვის ძალების განცხადებაში.

ისრაელის თავდაცვის ძალების ცნობით, “ზუსტი და მიზანმიმართული“ ოპერაცია ღაზას ალ-შიფას საავადმყოფოში ამ დრომდე გრძელდება.

ისრაელის თავდაცვის ჯარები „ჰამასის“ წევრებს საავადმყოფოს გარეთ მთელი ღამის განმავლობაში ებრძოდნენ და როგორც ისრაელის თავდაცვის ძალები აცხადებს, სამხედროებმა საავადმყოფოს ტერიტორიაზე ასაფეთქებელი მოწყობილობები აღმოაჩინეს.