კაია კალასი რუსეთ-უკრაინის ომზე - ეს არის გამოფიტვის ომი, უიმედო მდგომარეობა არ არის, მაგრამ ამას დიდი დრო სჭირდება

ესტონეთის პრემიერ-მინისტრის, კაია კალასის განცხადებით, რუსეთის ფედერაციასა და უკრაინას შორის ომთან დაკავშირებით სიტუაცია უიმედო არ არის.

„ეს არის გამოფიტვის ომი. უიმედო მდგომარეობა არ არის, მაგრამ ამას დიდი დრო სჭირდება“, - აღნიშნა კალასმა.

მისი თქმით, ასეთ ომში სამი ძირითადი ელემენტია: ხალხი, რესურსები და საბრძოლო სულისკვეთება.

„რუსეთი ფიქრობს, რომ მას შეუძლია უკრაინაზე მეტხანს გაუძლოს, მაგრამ მაქვს საფუძველი ვიფიქრო, რომ ჩვენი მხარდაჭერა დაეხმარება უკრაინას უფრო მეტხანს გაუძლოს ვიდრე რუსეთმა", - განაცხადა ესტონეთის პრემიერმა.

მისი თქმით, შეერთებული შტატები და ევროპის ქვეყნები უკრაინელ სამხედროებს წვრთნიან.

„ევროპა ამზადებს 30-40 ათასამდე სამხედრო მოსამსახურეს. თუ ამერიკაც ამდენივეს წვრთნის, მაშინ ეს არის 80 000 გაწვრთნილი ჯარისკაცი ახალწვეულების წინააღმდეგ, რომლებიც ომში რუსეთიდან მიდიან. ამიტომ, ხალხის თვალსაზრისით, ჩვენ შეგვიძლია ვიყოთ უფრო გამძლე, ვიდრე რუსეთი“, - აღნიშნა კალასმა.

რესურსებზე საუბრისას ესტონეთის ლიდერმა აღნიშნა, რომ ევროპის მთლიანი შიდა პროდუქტი შვიდჯერ აღემატება რუსეთის მშპ-ს. მისივე თქმით, რუსეთის ბიუჯეტზე სანქციებიც მოქმედებს.

რაც შეეხება სამხედრო დახმარებას, კალასმა ხაზი გაუსვა, რომ ე.წ. „რამშტაინის კოალიციის“ თავდაცვის ბიუჯეტი 13-ჯერ აღემატება რუსეთისას". ამასთან, ესტონეთის პრემიერის თქმით, დარწმუნებულია, რომ უკრაინელებს რუსებზე უფრო მაღალი საბრძოლო სულისკვეთება აქვთ.

„ისღა დაგვრჩენია, რომ უკრაინელების გამარჯვების გვჯეროდეს“, - აღნიშნა კალასმა.