ამერიკა საქართველოს ნომერ პირველი მეგობარი და სტრატეგიული პარტნიორია - ამერიკელი მეგობრების დახმარება რამდენიმე საკითხში გვჭირდება - რომ გავხდეთ ევროკავშირის სრულუფლებიანი წევრი, გავთავისუფლდეთ ოლიგარქიული რეჟიმისგან და საქართველოში ავაშენოთ დემოკრატიული, ძლიერი სახელმწიფო,- ამის შესახებ პარტია „სტრატეგია-აღმაშენებლის” ლიდერმა, გიორგი ვაშაძემ აშშ-ს ახალ ელჩთან, რობინ დანიგანთან შეხვედრის წინ განაცხადა.

მისივე განმარტებით, შეხვედრა ელჩის ინიციატივით იმართება.

„ნომერ პირველი საკითხი არის ის, რომ ამერიკა საქართველოს ნომერ პირველი მეგობარი და სტრატეგიული პარტნიორია. „ქართული ოცნების”, აი, ამ რუსული პროპაგანდის მიუხედავად, საზოგადოების პოზიცია ძალიან მყარია. ამიტომ ჩვენ გვჭირდება ამერიკელი მეგობრების დახმარება რამდენიმე საკითხში. პირველი, რომ გავხდეთ ევროკავშირის სრულუფლებიანი წევრი. ძალიან კარგად გვესმის, რომ ამერიკას ამ საკითხში ძალიან მნიშვნელოვანი ხმა აქვს. მეორე, გავთავისუფლდეთ ოლიგარქიული რეჟიმისგან საქართველოში. მესამე, საქართველოში დემოკრატიული, ძლიერი სახელმწიფო ავაშენოთ, სადაც ყველა მოქალაქის ინტერესი დაცული იქნება. ამისათვის მნიშვნელოვანია, არჩევნები მეტ-ნაკლებად ნორმალურ გარემოში მაინც ჩატარდეს, გრძელვადიანი სადამკვირვებლო ჯგუფები ამერიკიდან, ევროკავშირიდან, რომ „ქართულ ოცნებას” არჩევნების მასიური გაყალბების საშუალება არ მიეცეს. დანარჩენი, ჩვენ ძალიან კარგად ვიცით, როგორ უნდა გავიმარჯვოთ არჩევნებში და ეს არის ჩვენი ქართველი ხალხის გადასაწყვეტი. გარდა ამისა, გვექნება საუბარი მნიშვნელოვან საკითხებზე, რომლებიც საზოგადოებას აწუხებს, ეს არის სავიზო რეჟიმის საკითხები, თავისუფალი ვაჭრობის საკითხები, შავი ზღვის მხარდამჭერი აქტი, რომელიც საქართველოსაც ეხება და ძალიან მნიშვნელოვანია, რომ ეს ყველაფერი დროულად იქნეს მიღებული, რათა საქართველოში ამერიკული ინვესტიციები შემოვიდნენ. ყველა ამ საკითხზე და რაც მთავარია, პირადად გავიცნოთ ახლოს ქალბატონ ელჩს. შეხვედრა მისი ინიციატივითაა”, - განაცხადა გიორგი ვაშაძემ.

ამასთან, პარტიის ერთ-ერთი ლიდერის, სერგო ჩიხლაძის განცხადებით, შეხვედრაზე განსახილველი საკითხები იქნება ის, რასაც აშშ-ში ვიზიტების დროს კონგრესში და სახელმწიფო დეპარტამენტში აყენებდნენ.

„ელჩმა, მგონი, უკვე ძალიან მკაფიოდ ასახა თავისი დამოკიდებულება მიმდინარე მოვლენებზე. ისეთი, როგორიც არის მაგალითად, ანტიდასავლური პროპაგანდა, რომელსაც საქართველოში ხშირ შემთხვევაში ეწევა ხელისუფლება. აბსოლუტურად სწორად, „სისულელეები“ და „სასაცილო“ უწოდა ამ ყველაფერს - USAID-ის წინააღმდეგ წამოწყებულ კამპანიას, ან იმას, რომ „დასავლეთს ომი უნდა“. ამიტომ, ამით მან ძალიან მკაფიო განცხადება გააკეთა, რომ რაღაცა ანტიდასავლურ პროპაგანდას, ჰიბრიდულ ომს რუსეთის მხრიდან აწარმოებს, ქალბატონი ელჩი არ შეეგუება. მოლოდინიც ასეთია. ძირითადი საკითხები იქნება ის, რასაც ჩვენ ვაყენებდით აშშ-ში, სახელმწიფო დეპარტამენტში, კონგრესში, სენატში და ა.შ.”, - განაცხადა სერგო ჩიხლაძემ.