გარემოს დაცვისა და სოფლის მეურნეობის სამინისტროსთან რაჭის ტყეებთან დაკავშირებით აქცია უკვე მესამე დღეა მიმდინარეობს.

აქციის მონაწილეები გარემოს დაცვისა და სოფლის მეურნეობის მინისტრთან, ოთარ შამუგიასთან შეხვედრას და იმის გაგებას ითხოვენ, რა გეგმა აქვს სამინისტროს რაჭის ტყეებთან დაკავშირებით.

ამასთან, მათ გუშინდელ აქციაზე განაცხადეს, რომ ერთ-ერთი მოთხოვნაა, სახალხო დამცველი, ლევან იოსელიანი აქციის ადგილას მივიდეს.

ასევე, პროტესტის მონაწილეების ძირითადი მოთხოვნაა - რაჭა-ლეჩხუმისა და ქვემო სვანეთის რეგიონში 2022 წლის მარტში 104 712 ჰექტარ ტყეზე 49-წლიანი სამონადირეო ლიცენზიის გაუქმება.

აქციის მონაწილეებს თან მოტანილი აქვთ ბანერები, წარწერით - „რაჭა არ იყიდება”, „ვის კითხეთ? ტყე ეკუთვნის ხალხს”.

აქციის ერთ-ერთი მონაწილის, მაკა სულაძის განცხადებით, „აქცია იქნება უწყვეტი მანამ, სანამ არ დაკმაყოფილდება მოთხოვნები”.

ადგილზე მობილიზებული არიან სამართალდამცველები.

საკითხს 18 ნოემბერს გარემოს დაცვისა და სოფლის მეურნეობის სამინისტრო გამოეხმაურა. უწყების განცხადებით, არ არსებობს საფუძველი საპროტესტო აქციების გასამართად და „ტყუილია, თითქოს რაჭაში ტყე გაიყიდა”.

მათივე განმარტებით, სამონადირეო ლიცენზიის ძალადაკარგულად გამოცხადების საკითხი კანონმდებლობით გათვალისწინებული წესით შესაბამის ვადებში განიხილება.