ვოლოდიმირ ზელენსკი კიევზე რუსეთის მასშტაბურ შეტევას გამოეხმაურა. უკრაინის პრეზიდენტმა ჰოლოდომორის მსხვერპლთა ხსოვნის დღეს, კიევზე რუსების მიერ განხორციელებულ მასშტაბურ იერიშს მიზანმიმართული ტერორიზმი უწოდა.

„70-ზე მეტი „შაჰედის“ ტიპის უპილოტო საფრენი აპარატი ჰოლოდომორის გენოციდის მსხვერპლთა ხსოვნის დღეს. მიზანმიმართული ტერორიზმი. სწორედ ამ დროს. რუსეთის ხელმძღვანელობა ამაყობს იმით, რომ მას შეუძლია ადამიანები მოკლას“, - წერს ზელენსკი „ტელეგრამის“ არხზე.

„ჩვენ ვაგრძელებთ მუშაობას, რათა მსოფლიო რუსული ტერორიზმისგან დასაცავად გავაერთიანოთ. ტერორისტული სახელმწიფო უნდა დამარცხდეს და პასუხი აგოს იმაზე, რაც ჩაიდინა“, - აღნიშნა ზელენსკიმ.