თუ ღაზას მოსახლეობისთვის უკეთესი ცხოვრება გსურთ, მაშინ „ჰამასი“ უნდა განადგურდეს, - ამის შესახებ ისრაელის პრემიერ-მინისტრმა, ბენიამინ ნეთანიაჰუმ ამერიკელ ბიზნესმენ, ილონ მასკთან შეხვედრისას განაცხადა.

ამერიკელი ბიზნესმენი, ილონ მასკი დღეს ისრაელს ეწვია და პრემიერ-მინისტრ, ბენიამინ ნეთანიაჰუსთან და ისრაელის მთავრობის სხვა წარმომადგენლებთან ერთად კიბუცში ჩავიდა, სადაც 7 ოქტომბერს „ჰამასმა“ სასტიკი თავდასხმა განახორციელა.

„თუ ღაზას მოსახლეობისთვის უსაფრთხოება, მშვიდობა და უკეთესი ცხოვრება გსურთ, მაშინ „ჰამასი“ უნდა განადგურდეს. ჯერ მომწამლავი რეჟიმი უნდა განადგურდეს, როგორც ეს გერმანიასა და იაპონიაში გაკეთდა“, - განაცხადა ნეთანიაჰუმ.

ისრაელის პრემიერის სიტყვებს ილონ მასკი გამოეხმაურა და აღნიშნა, რომ სხვა არჩევანი არ არის.