„თავდაცვის კოდექსში“ დაგეგმილი ცვლილებები, ერთის მხრივ, არაკეთილსინდისიერი მიდგომით ჯარისგან თავის არიდებას გამორიცხავს და მეორე მხრივ, რეალურ შემთხვევებში სტუდენტის განათლების უფლების რეალიზებას უზრუნველყოფს, - ეს განცხადება პარლამენტის თავდაცვისა და უშიშროების კომიტეტის სხდომაზე თავდაცვის მინისტრის მოადგილემ გრიგოლ გიორგაძემ გააკეთა.

გიორგაძემ კომიტეტს წარუდგინა პროექტი, რომლის თანახმად, ეროვნულ სამხედრო სამსახურში გაწვევის გადავადება არ შეეხება სტუდენტს, რომელიც დისტანციურად სწავლობს; ასევე უცხო ქვეყნის უმაღლესი საგანმანათლებლო დაწესებულების სტუდენტს, რომელიც განათლებას საქართველოდან დისტანციურად იღებს.

„სტუდენტის სტატუსი წვევამდელთა ეროვნულ სამხედრო სამსახურში გაწვევის გადავადების საფუძველია. ეს ეხებათ როგორც დასწრებული სწავლების, ასევე დისტანციურად სწავლების სტუდენტებს. ჩვენ გვაქვს ინფორმაცია, რომ შესაძლოა სხვადასხვა ქვეყანაში, სადაც დისტანციური სტუდენტის სტატუსის მოპოვება მარტივია, ეს გამოყენებულ იქნეს როგორც ერთგვარი ხვრელი ჯარისგან თავის არიდების“, - განაცხადა გიორგაძემ.

პარლამენტში წარდგენილი ცვლილებით, 2025 წლიდან დისტანციურ სწავლებაზე მყოფ სტუდენტებს შესაძლებლობა ექნებათ აირჩიონ სტუდენტური მომზადების პროგრამიდან მათთვის მისაღები მოდელი და ოთხი წლის განმავლობაში აღნიშნული პროგრამა გაიარონ.

„თავდაცვის კოდექსში“ დაგეგმილ ცვლილებებს პარლამენტი დაჩქარებული წესით იხილავს.