ვატიკანში საქართველოს საელჩოს ორგანიზებით, საზეიმო მიღება გაიმართა, რომელიც ივერიის ღვთისმშობლის მოზაიკური ფრესკის აღმართვას მიეძღვნა

ვატიკანში საქართველოს საელჩოს ორგანიზებით, ისტორიულ სასახლეში, პალაცო დელა კანჩელარიაში, საზეიმო მიღება გაიმართა, რომელიც ვატიკანში ივერიის ღვთისმშობლის მოზაიკური ფრესკის აღმართვას მიეძღვნა. აღნიშნულს საგარეო საქმეთა სამინისტრო ავრცელებს.

უწყების ცნობითვე, მიღებაზე სიტყვით საქართველოს საგარეო საქმეთა მინისტრის მოადგილე ხათუნა თოთლაძე, ჭიათურისა და საჩხერის მიტროპოლიტი მეუფე დანიელი, ვატიკანის სახელმწიფო მდივანი, კარდინალი პიეტრო პაროლონი და ვატიკანში საქართველოს ელჩი ქეთევან ბაგრატიონ-მუხრანბატონი გამოვიდნენ.

სიტყვით გამოსვლისას, საგარეო საქმეთა მინისტრის მოადგილემ ხაზი გაუსვა ქეთევან ბაგრატიონ-მუხრანბატონის განსაკუთრებულ წვლილს საქართველოსა და წმინდა საყდრის ურთიერთობათა განვითარებაში.

„დღეს ჩვენ შემთხვევით ვსარგებლობთ და საქართველოსა და წმიდა საყდარს შორის არსებულ მტკიცე მეგობრობას აღვნიშნავთ, რომელიც დაკავშირებულია ისტორიის მრავალი მოვლენით და ღრმად არის ფესვგადგმული ქრისტიანულ კულტურაში", - განაცხადა ხათუნა თოთლაძემ.

მისივე თქმით, ორი სუვერენული სახელმწიფო - საქართველო და წმინდა საყდარი - მშვიდობისა და სტაბილურობის ფასეულობებს იზიარებს, როგორც უზენაეს ნორმებს, რომელთაგანაც უნდა მომდინარეობდეს სახელმწიფოს ქმედებები, ისევე, როგორც სამყაროს ხედვა, სადაც ტოლერანტობა, პატივისცემა და ურთიერთგაგება დომინირებს.

მინისტრის მოადგილემ ვრცლად ისაუბრა ორი ქვეყნის ისტორიულ კავშირებზეც.

„ისტორიულად, მართლმადიდებელი და კათოლიკე ქრისტიანები გვერდიგვერდ იდგნენ საქართველოს აღორძინების გზაზე და კათოლიკური ეკლესია ყოველთვის იყო ჩვენს ქვეყანაში ევროპული ღირებულებებისა და ცოდნის გავრცელების წინა პლანზე. დღეს წმინდა საყდარი საქართველოს ევროპული გზის, ჩვენი ქვეყნის მრავალწლიანი და ცივილიზაციური არჩევანის მტკიცე მხარდამჭერია. ხვალ, ვატიკანის ბაღებში, მექნება პატივი, მონაწილეობა მივიღო ივერიის ღვთისმშობლის ქართული მოზაიკის საინაუგურაციო ცერემონიაში. აღნიშნული წარმოადგენს კიდევ ერთ დამატებით იმპულსს ჩვენი ორმხრივი ურთიერთობებისთვის, რომელიც იქნება ჩვენი მჭიდრო სულიერი და კულტურული კავშირების მუდმივი დადასტურება“, - განაცხადა ხათუნა თოთლაძემ.

აღსანიშნავია, რომ საღამოს „სუხიშვილები“ და ანსამბლი „ბასიანი“ აფორმებდნენ.