„ერთიანი ნაციონალური მოძრაობის“ ერთ-ერთი წევრის გიორგი კაპანაძის განცხადებით, პარტიის თავმჯდომარის ლევან ხაბეიშვილის გადაყენების შესახებ მოთხოვნის გაჟღერება არასერიოზული და უსაფუძვლოა.

მისი შეფასებით, ასეთი მოთხოვნის გაჟღერება წარმოადგენს პრეზიდენტ სააკაშვილის პოზიციებთან დაპირისპირებას.

„ერთიან ნაციონალურ მოძრაობას” ჰყავს მაღალი ლეგიტიმაციით, პირველივე ტურში არჩეული თავმჯდომარე. „ერთიან ნაციონალურ მოძრაობას” ჰყავს ლეგიტიმური პოლიტიკური საბჭო და სამდივნო. სწორედ ასეთად მიიჩნევს და ახასიათებს „ერთიანი ნაციონალური მოძრაობის” ინსტიტუციებს პრეზიდენტი სააკაშვილი. ამიტომ, ასეთი არასერიოზული და ასეთი უსაფუძვლო მოთხოვნის გაჟღერება პირდაპირ გეტყვით, წარმოადგენს პრეზიდენტ სააკაშვილის პოზიციებთან დაპირისპირებას. ამიტომ, კარგი იქნებოდა, იმ ადამიანებს, ვინც ითხოვს მათ შორის თავმჯდომარის გადადგომას, ჰქონოდათ წინასწარი კონსულტაციები. პრეზიდენტ სააკაშვილის მკვეთრი და ცხადი პოზიციაა, რომ ის მხარს უჭერს ლევან ხაბეიშვილს, პოლიტიკურ საბჭოს და სამდივნოს. ყველა ეს ინსტიტუცია არის ლეგიტიმური. ლევან ხაბეიშვილმა პირველივე ტურში მაღალი ლეგიტიმაციით გაიმარჯვა”, - განაცხადა გიორგი კაპანაძემ.

ცნობისთვის, ზუგდიდის, ხობისა და ჭიათურის მუნიციპალიტეტის საკრებულოების ფრაქცია „ერთიანი ნაციონალური მოძრაობის“ თავმჯდომარე, წევრები და თანამშრომლები პარტიაში შექმნილ დაპირისპირებაზე პასუხისმგებლობას მოქმედ მენეჯმენტს აკისრებენ და პარტიის თავმჯდომარეს, ლევან ხაბეიშვილს მოუწოდებენ, თანამდებობა დატოვოს.

მათი განცხადებები სამოქალაქო მოძრაობა „ძალა ერთობაშიას“ „ფეისბუქ“ გვერდზე ვრცელდება.