არჩევნები „ნაციონალურ მოძრაობაში" ჩატარდება წესდებით განსაზღვრულ ვადაში, ერთი წლის შემდეგ - მელიას საარჩევნო შტაბის წარმომადგენლებს მოვუწოდებთ, შეწყვიტონ აღვირახსნილი კამპანია, - ამის შესახებ განცხადება "ერთიანი ნაციონალური მოძრაობის" დეპუტატმა ლევან ბეჟაშვილმა გააკეთა.

მისი თქმით, კამპანიას, რომელიც ორი დღეა მიმდინარეობს, არანაირი შედეგი არ ექნება.

"ორი დღის განმავლობაში მიმდინარეობს ნიკა მელიას საარჩევნო შტაბის და მისი ცალკეული წარმომადგენლების ორკესტრირებული კამპანია, რომელსაც არანაირი შედეგი არ ექნება. წარმოუდგენელია, ამ ადამიანებიდან ზოგიერთი მეორედ და მესამედ აკეთებს ამგვარ განცხადებებს, რაც პარტიის წინააღმდეგ არის მიმართული და ბუნებრივია, ეხმიანება და ესადაგება პირდაპირ "ქართული ოცნების" ინტერესებს. ამიტომ მნიშვნელოვანია, ყველამ კარგად იცოდეს, არჩევნები აუცილებლად ჩატარდება „ერთიან ნაციონალურ მოძრაობაში“, ოღონდ ჩატარდება წესდებით განსაზღვრულ ვადაში, ერთი წლის შემდეგ, 2025 წლის 1- ელ იანვარს. ჩვენ ყველას მოვუწოდებთ, პარტიის კარები ღიაა ყველასთვის, ვისთვისაც მნიშვნელოვანია "ნაციონალური მოძრაობა" და მისი ბრძოლა "ქართული ოცნების," იგივე რუსული ოცნების წინააღმდეგ. ამ ადამიანებისთვის კარი ღიაა და ჩვენ უახლოეს პერიოდში მივიღებთ მნიშვნელოვან და კარგ გადაწყვეტილებებს და მოვუწოდებთ ნიკა მელიას, დამარცხებული თავმჯდომარის კანდიდატობის საარჩევნო შტაბის წარმომადგენლებს შეწყვიტონ მსგავსი აღვირახსნილი კამპანია "ნაციონალური მოძრაობის" წინააღმდეგ.

ნიკა მელიას, სამწუხაროდ, საჯაროდ ტელეეთერში, დებატებში გაკეთებული აქვს შესაბამისი განცხადება, რომ აღარ არის „ნაციონალურ მოძრაობაში" და მისი კამპანია მთელი 8-9 თვის განმავლობაში ადასტურებდა იმას, რომ ემიჯნებოდა „ნაციონალურ მოძრაობას" და მოქმედებდა პარტიის ინტერესების საწინააღმდეგოდ“, - განაცხადა ბეჟაშვილმა.