„დიდი შვიდეულის“ ქვეყნების საგარეო საქმეთა მინისტრები „ჰამასს“ მძევლების გათავისუფლებისკენ მოუწოდებენ.

ამის შესახებ ინფორმაციას Reuters-ი ავრცელებს.

აშშ-ის სახელმწიფო დეპარტამენტის ცნობით, კანადის, საფრანგეთის, გერმანიის, იტალიის, იაპონიის, ბრიტანეთის და აშშ-ის საგარეო საქმეთა მინისტრები, ასევე ევროკავშირის უმაღლესი წარმომადგენელი „ჰამასის“ მიერ დაკავებული მძევლების უპირობო გათავისუფლებას მოითხოვენ.

„დიდი შვიდეულის“ სახელმწიფოები აცხადებენ, რომ ისინი მხარს უჭერენ ღაზაში მიმდინარე პაუზის გაგრძელებას.

„ჩვენ მხარს ვუჭერთ მიმდინარე პაუზის გახანგრძლივებას და მომავალ ჰუმანიტარულ პაუზებს, რათა შესაძლებელი გახდეს მოსახლეობისთვის დახმარების მიწოდების დაჩქარება და ყველა მძევლის გათავისუფლება“, - ნათქვამია „დიდი შვიდეულის“ განცხადებაში.