განათლებისა და მეცნიერების კომიტეტის თავმჯდომარის მოადგილემ ბაია კვიციანმა თემატური მოკვლევის ფარგლებში გაცემული რეკომენდაციების შესრულების მონიტორინგთან დაკავშირებით, მორიგი შეხვედრა გამართა. ამის შესახებ ინფორმაციას პარლამენტის პრესსამსახური ავრცელებს.

ბაია კვიციანი სამუშაო შეხვედრის ფორმატში, საერთაშორისო, არასამთავრობო ორგანიზაციებისა და ზოგადსაგანმანათლებლო დაწესებულებების წარმომადგენლებს შეხვდა და რეკომენდაციების შესრულებასთან დაკავშირებით, მათგან ინფორმაცია მოისმინა.

COVID-19 პანდემიის ზოგად განათლებაზე ზეგავლენის შეფასების მიზნით, თემატური მოკვლევა განათლებისა და მეცნიერების კომიტეტმა 2021 წელს განახორციელა.

„მოკვლევის ფარგლებში გაცემული რეკომენდაციების შესრულების მონიტორინგი, კომიტეტის 2023 წლის ერთ-ერთ პრიორიტეტს წარმოადგენს. პროცესს განათლებისა და მეცნიერების კომიტეტის თავმჯდომარის მოადგილე ბაია კვიციანი ხელმძღვანელობს. სამუშაო პროცესის საბოლოო ეტაპზე მომზადდება დასკვნა, რომელშიც წარმოდგენილი იქნება გაცემული რეკომენდაციების შესრულების კუთხით არსებული მდგომარეობა.

თემატური მოკვლევის, COVID 19-ის გავლენა ზოგად განათლებაზე, ფარგლებში გაცემული რეკომენდაციების მონიტორინგი USAID-ის ეროვნული მმართველობის პროგრამის მხარდაჭერით ხორციელდება“,- ნათქვამია ინფორმაციაში.