ფოთში „ერთიანი ნაციონალური მოძრაობის“ წევრები სანაპირო ზოლზე არსებულ მდგომარეობას აპროტესტებენ.

მათი განცხადებით, რამდენიმე თვის წინ ადგილობრივ ხელისუფლებას მოუწოდეს, რომ გამაგრებითი სამუშაოები ჩაეტარებინათ. მათივე თქმით, განხორციელდა ზედაპირული შეკეთება, რის გამოც სტიქიამ სანაპირო ზოლს მნიშვნელოვანი ზიანი მიაყენა. ისინი საკრებულოს თავმჯდომარისა და ქალაქის მერისგან დროულ რეაგირებას ითხოვენ.

„რამდენიმე თვის წინ გავაკეთეთ განცხადება არსებულ პრობლემასთან დაკავშირებით, თუ როგორი განადგურებულია ფოთის სანაპირო ზოლი. მოვუწოდეთ ადგილობრივ ხელისუფლებას, რომ მოეგვარებინათ ეს პრობლემა. ვინაიდან, ზედაპირული შეკეთება არ ნიშნავდა პრობლემის მოგვარებას და მივიღეთ ის შედეგი, რაც მივიღეთ . შეიძლება თქვან და გაიმართლონ თავი, რომ სტიქიას წინ ვერავინ გადაეღობება, მაგრამ შესაძლებელია სტიქიამ მოიტანოს მინიმალური ზარალი და დაზიანება. ამ შემთხვევაში სტიქიამ მაქსიმალური ზარალი მოუტანა ფოთის სანაპირო ზოლს. ეს მონაკვეთი გაირღვა და ახლა შესაძლოა გაგრძელდეს რღვევა მთლიან სანაპირო ზოლზე. აქვე არის სასაფლაო და მასაც ემუქრება წალეკვა. უნდა ჩატარდეს სარეაბილიტაციო სამუშაოები, გამაგრება უნდა მოხდეს სანაპირო ზოლის და არ უნდა იყოს ზედაპირულად შეკეთებული. სანაპირო ზოლს ემუქრება მთლიანად მოწყვეტა. არანაირი რეაგირება ადგილობრივი ხელისუფლების მხრიდან არ არის, თუ როდის და რას დაიწყებენ. მოვუწოდებ საკრებულოს თავმჯდომარეს და ქალაქის მერს მიიღონ მაქსიმალური ზომები და ქალაქს დაუბრუნონ სანაპირო ზოლი“, -განაცხადა საკრებულოს წევრმა „ ერთიანი ნაციონალური მოძრაობიდან“ ანა ჯოჯუამ.