გიორგი ტყემალაძე - უნივერსიტეტის ქუჩის გახსნა მნიშვნელოვნად გააუმჯობესებს სატრანსპორტო გადაადგილებას აღნიშნულ არეალში

ახლად რეაბილიტირებულ უნივერსიტეტის ქუჩის გახსნას, რომელზეც მოძრაობა ორმხრივად აღდგა, დედაქალაქის მერთან, კახა კალაძესთან ერთად თბილისის საკრებულოს თავმჯდომარე გიორგი ტყემალაძე დაესწრო. როგორც მან განაცხადა, უნივერსიტეტის ქუჩა ქალაქის სატრანსპორტო ქსელის ერთ-ერთი უმნიშვნელოვანესი კვანძია. აღნიშნულის შესახებ ინფორმაციას თბილისის საკრებულო ავრცელებს.

„დასრულდა უნივერსიტეტის ქუჩის რეაბილიტაცია. ეს არის ერთ-ერთი ძალიან მნიშვნელოვანი კვანძი. სრულად აღდგა მიწისქვეშა კომუნიკაციები. ახლო მომავალში ბაგები-უნივერსიტეტის ქუჩის ხიდის სამუშაოები დასრულდება და ერთობლიობაში, ეს აღნიშნულ არეალში სატრანსპორტო გადაადგილებას მნიშვნელოვნად გააუმჯობესებს.

ძალიან მნიშვნელოვანია, რომ სატრანსპორტო ინფრასტრუქტურის რეაბილიტაციასთან ერთად, მიწისქვეშა კომუნიკაციები მოწესრიგდა. მინდა მადლობა გადავუხადო ყველას, ვინც ამ პროექტში მიიღო მონაწილეობა“, - განაცხადა გიორგი ტყემალაძემ.

„უნივერსიტეტის ქუჩაზე სრულად შეიცვალა და განახლდა ყველა ტიპის მიწისქვეშა საკომუნიკაციო ქსელი; რეაბილიტირდა 2,5-კილომეტრი გზის სავალი ნაწილი, რამდენიმეფენიანი ასფალტის საფარი დაიგო; საჰაერო სადენები მიწისქვეშა კაბელ-არხებში განთავსდა; მოეწყო გარე განათების ახალი ქსელი; დამონტაჟდა თანამედროვე LED სანათები; ოთხზოლიანი ამსვლელ-ჩამომსვლელი გზა დაიხაზა და მოეწყო საზოგადოებრივი ტრანსპორტისთვის განკუთვნილი ახალი მოსაცდელები; სრულდება ტროტუარების მოწყობის სამუშაოები.

გარდა ამისა, გზის უსაფრთხოებისთვის გარკვეულ ადგილებში ფერდის დამცავი კედლები მოეწყო. აღნიშნული სამუშაოები დედაქალაქის ბიუჯეტიდან 18 მილიონი ლარით დაფინანსდა“,- აღნიშნულია უწყების მიერ გავრცელებულ ინფორმაციაში.