ოპოზიციის მხრიდან სპეკულირება „მოქალაქეთა პოლიტიკური გაერთიანებების შესახებ“ კანონსა და “საარჩევნო კოდექსში“ დაგეგმილ ცვლილებებთან დაკავშირებით, ნათლად აჩვენებს მათ უსუსურობას, - ასე გამოეხმაურა აჭარის უმაღლესი საბჭოს ფრაქცია “ქართული ოცნების“ თავმჯდომარე გიორგი მანველიძე იურიდიული პირებისთვის პარტიების დაფინანსების აკრძალვის საკითხზე ოპოზიციის კრიტიკას.

„იურიდიული პირებისთვის პარტიების დაფინანსების აკრძალვა ვენეციის კომისიის ერთ-ერთი მოთხოვნაა და ოპოზიციის მხრიდან, თემით სპეკულირება მათ უსუსურობაზე მეტყველებს. აღნიშნული პროექტი ვენეციის კომისიის მიერ 2023 წლის 12 ივნისს გამოქვეყნებული რეკომენდაციის გათვალისწინებით მომზადდა - „დეოლიგარქიზაციის შესახებ" პუნქტში მითითებულია იურიდიული პირებისთვის პოლიტიკური პარტიების დაფინანსების შესაძლებლობის აკრძალვა. შესაბამისი პუნქტი აისახა დეოლიგარქიზაციის სამოქმედო გეგმაშიც“, - განაცხადა გიორგი მანველიძემ.

მისივე თქმით, კანონპროექტი შემუშავებულია ჯანსაღი კონკურენციის უზრუნველყოფისა და სამართლიანი საარჩევნო გარემოს შენარჩუნების მიზნით.

„იმ პარტიებს, ვისაც დემოკრატიულ, თანასწორუფლებიან გარემოში არსებობა არ შეუძლიათ, ვურჩევ, გაქრნენ პოლიტიკური არენიდან“, - აღნიშნულია გიორგი მანველიძის განცხადებაში, რომელსაც აჭარის უმაღლესი საბჭო ავრცელებს.