ისრაელის საგარეო საქმეთა მინისტრის განცხადებით, ისრაელმა გაერო-ს ჰუმანიტარულ კოორდინატორს, ლინ ჰასტინგსს ორგანიზაციის მიკერძოებულობის გამო, ვიზა გაუუქმა.

„ჩვენ აღარ ვიქნებით ჩუმად გაერო-ს მიკერძოებულობასთან დაკავშირებით“, - განაცხადა ისრაელის საგარეო საქმეთა მინისტრმა ელი კოენმა.

მისი თქმით, ლინ ჰასტინგსმა, რომელიც არის ახლო აღმოსავლეთის სამშვიდობო პროცესისთვის გაერო-ს სპეციალური კოორდინატორის მოადგილე და გაერო-ს მუდმივი კოორდინატორი პალესტინის ოკუპირებული ტერიტორიისთვის, არ დაგმო „ჰამასი“ 7 ოქტომბრის თავდასხმის დროს ჩადენილი ქმედებების გამო.

„მან, ვინც არ დაგმო „ჰამასი“ 1200 ისრაელელის სასტიკი ხოცვა-ჟლეტისთვის, ჩვილებისა და მოხუცების გატაცებისთვის, შეურაცხყოფისა და გაუპატიურების შემზარავი აქტებისთვის და ღაზას მაცხოვრებლების ცოცხალ ფარებად გამოყენებისთვის, არამედ გმობს ისრაელს, დემოკრატიულ ქვეყანას, რომელიც იცავს თავის მოქალაქეებს, არ შეიძლება იმსახუროს გაერო-ში და შევიდეს ისრაელში“, - განაცხადა კოენმა.

გაერო-ს გენერალური მდივნის პრესსპიკერის, სტეფან დუჟარიკის განცხადებით, ლინ ჰასტინგს ვიზა გასულ კვირას გაუუქმდა. მისი თქმით, გაერო-ს გენერალურ მდივანს ჰასტინგსის მიმართ სრული ნდობა აქვს.