წითელი ჯვრის საერთაშორისო კომიტეტის სახელით, მინდა ჩვენი გულწრფელი სამძიმარი გამოვუცხადო იმ ოჯახებს, რომლებმაც თავიანთი ახლობლების ნეშტები მიიღეს, - ამის შესახებ წითელი ჯვრის საერთაშორისო კომიტეტის დელეგაციის ხელმძღვანელმა საქართველოში, ან მონტავონმა სამების საკათედრო ტაძართან ჟურნალისტებს განუცხადა.

„ეს არის ძალიან განსაკუთრებული მომენტი ამ ოჯახებისთვის, რომლებიც იმსახურებენ ჩვენს პატივისცემას და აღიარებას იმ მწუხარებისთვის, რასაც განიცდიან. ჩვენი ფიქრები ასევე არის იმ ოჯახებთან, რომელთა ახლობლები ჯერ კიდევ უგზო-უკვლოდ დაკარგულები არიან. მინდა ვთქვა, რომ ყველა ჩართულ აქტორს შორის მჭიდრო თანამშრომლობა, ინსტიტუტებსა და სამოქალაქო საზოგადოებას შორის კრიტიკულად მნიშვნელოვანია იმ ოჯახების ეფექტური მხარდაჭერის აღმოჩენისთვის, რომლებიც ჯერ კიდევ დაკარგულად ითვლებიან“, - აღნიშნა ან მონტავონმა.

მისი თქმით, 2023 წელს საქართველოს ხელისუფლებამ, შერიგების საკითხებში სახელმწიფო სამინისტროს ხელმძღვანელობით, მკვეთრად და მნიშვნელოვნად გააძლიერა თავისი ჩართულობა ამ ოჯახებთან.

„ამ მხრივ, აღსანიშნავია ხსოვნის ღონისძიებების და ოჯახებთან საინფორმაციო და შეხვედრების ორგანიზება. 2024 წელს ეს პროცესი გაგრძელდება და საქართველოს ხელისუფლება კიდევ უფრო გაზრდის ჩართულობას არა მხოლოდ ოჯახების მხარდაჭერის კუთხით, არამედ უგზო-უკვლოდ დაკარგულების ძიების კუთხით. ყველაზე უფრო მნიშვნელოვანია, რომ ოჯახები მჭიდროდ იყვნენ დაკავშირებული ამ პროცესთან, მათთან გაიმართოს კონსულტაციები და მათი აზრი გათვალისწინებული იქნას, რათა მომავალი გადაწყვეტილებები მათთვის მნიშვნელოვანო იყოს“, - აღნიშნა ან მონტავონმა.