გაერო-ს უშიშროების საბჭო დღეს შეიკრიბება და კენჭს უყრის რეზოლუციას ისრაელი-ჰამასის ომში ცეცხლის დაუყოვნებლივ შეწყვეტის შესახებ.

ორგანიზაციის გენერალურმა მდივანმა, ანტონიო გუტერეშმა საბჭოს შეხვედრა გაერო-ს წესდების 99-ე მუხლის გამოყენებით მოითხოვა, სადაც ნათქვამია, რომ გენერალურ მდივანს შეუძლია, საბჭოს ყურადღება მიმართოს ნებისმიერი საკითხისკენ, რომელიც, მისი აზრით, შეიძლება საფრთხეს უქმნიდეს საერთაშორისო ურთიერთობების შენარჩუნებას, მშვიდობასა და უსაფრთხოებას.

საბჭოსთვის გაგზავნილ წერილში გუტერეში წერს, რომ ისრაელის თავდაცვის ძალების მხრიდან მუდმივი დაბომბვის ფონზე, მოსალოდნელია, რომ საზოგადოებრივი წესრიგი მალე მთლიანად დაირღვეს, რაც შეუძლებელს გახდის შეზღუდული ჰუმანიტარული დახმარების მიწოდებასაც კი.

რეზოლუციის პროექტი, რომელსაც გაერო-ს უშიშროების საბჭომ კენჭი უნდა უყაროს არაბთა გაერთიანებულმა საამიროებმა მოამზადა.