საქართველოს ნოტარიუსთა პალატის გამგეობის თავმჯდომარე ეკატერინე ნანდოშვილმა და ნოტარიუსმა, ნოტარიუსთა საერთაშორისო კავშირის ევროპის საქმეთა კომისიის წევრმა, ნინო ხოფერიამ გენერალურ ასამბლეაზე მოხსენებაში ისაუბრეს ქართული ნოტარიატის ევროკავშირის ნოტარიუსთა საბჭოსთან პარტნიორობის დამყარების მნიშვნელობაზე. ამის შესახებ ინფორმაციას იუსტიციის სამინისტრო ავრცელებს.

მათივე ინფორმაციით, პარტნიორობის შეთანხმება სანოტარო სფეროში სამართლებრივი უსაფრთხოებისთვის მოქალაქეთა უფლებების და კანონიერი ინტერესების დაცვას ითვალისწინებს.

„თანამშრომლობის ფარგლებში გაიმართება შეხვედრები, კონფერენციები, სემინარები, რომელშიც მონაწილეობას მიიღებენ ქართველი ნოტარიუსები. წელიწადში ერთხელ მხარეები განიხილავენ სანოტარო სფეროსთან დაკავშირებულ მნიშვნელოვან თემებს: დიგიტალიზაცია, სანოტარო სამართლის განვითარება, ფულის გათეთრებისა და ტერორიზმის დაფინანსების პრევენცია და სხვ.

საქართველოს ნოტარიუსთა პალატასა და ევროკავშირის ნოტარიუსთა საბჭოს შორის პარტნიორად მიღებაზე შეთანხმება ბრიუსელში, ევროკავშირის ნოტარიუსთა საბჭოს (CNUE) გენერალურ ასამბლეაზე შედგა. ასამბლეა საბჭოს 30 წლის იუბილეს მიეძღვნა.

საქართველოს ევროინტეგრაციისაკენ მიმავალ გზაზე, ქართული ნოტარიატის ევროკავშირის წევრი ქვეყნების ნოტარიატებთან აქტიური ურთიერთობა ქართული სანოტარო სფეროს შემდგომი განვითარებისთვის მნიშვნელოვანია.

ევროკავშირის ნოტარიუსთა საბჭოში სრული გაწევრიანებისთვის აუცილებელია ნოტარიუსთა საერთშორისო კავშირის და ევროკავშირის წევრობა. საერთაშორისო კავშირის წევრობის პირობას საქართველოს ნოტარიუსთა პალატა 2007 წლიდან აკმაყოფილებს.

პარტნიორად მიღების შეთანხმებას წინ უძღოდა, 2023 წლის ივლისში გერმანიის ფედერალური ნოტარიუსთა პალატის სამართლებრივი მრჩევლის, რიჩარდ ბოკის ვიზიტი საქართველოს ნოტარიუსთა პალატაში და მემორანდუმის გაფორმება გერმანულ ნოტარიატთან“,- აღნიშნულია გავრცელებულ ინფორმაციაში.