„ქართული ოცნების“ მხარდაჭერა ახალგაზრდებში შედარებით დაბალია, - ამის შესახებ „ეროვნულ-დემოკრატიული ინსტიტუტის" საზოგადოებრივი განწყობის 2023 წლის ოქტომბერ-ნოემბერში ჩატარებული კვლევაშია ნათქვამი.

კითხვაზე, საქართველოში არსებულ მრავალ პოლიტიკურ პარტიას შორის რომელი დგას თქვენს შეხედულებებთან ყველაზე ახლოს, 18-34 წლის ასაკობრივ კატეგორიაში გამოკითხულთა ნახევარი აცხადებს, რომ მათ შეხედულებებთან ახლოს არც ერთი პარტია არ დგას, იმავე პასუხს აფიქსირებს 35-54 ასაკობრივი კატეგორიის 48% და 55 წელს ზემოთ მყოფი გამოკითხული პირის 42%. ამასთან, აღსანიშნავია, რომ „ქართულ ოცნებას“, როგორც მათ შეხედულებებთან ახლოს მდგომ პარტიას, 18-34 წლის ასაკობრივი კატეგორიის მხოლოდ 13% ასახელებს, უფრო მაღალია მაჩვენებელი ფიქსირდება 35-54 და 55 წელს ზემოთ ასაკობრივ კატეგორიაში, სადაც შესაბამისად, 20% და 24% ასახელებს „ქართულ ოცნებას“ მათ შეხედულებებთან ახლოს მდგომ პარტიად. ამასთან, ახალგაზრდების მხოლოდ 2% ამბობს, რომ მათ შეხედულებებთან ახლოს „ერთიანი ნაციონალური მოძრაობაა“.

ცნობისთვის, კვლევის მიზანია, ხელი შეუწყოს ისეთი პოლიტიკისა და მმართველობის ჩამოყალიბებას, რომელიც უფრო მეტად იქნება მორგებული მოსახლეობის საჭიროებებზე. აღნიშნული ანგარიში 14 ოქტომბრიდან 4 ნოემბრამდე ქვეყნის მასშტაბით ჩატარებულ, საქართველოს ზრდასრული მოსახლეობის წარმომადგენლობით პირისპირი გამოკითხვის შედეგებს ემყარება (ოკუპირებული ტერიტორიების გამოკლებით). ოქტომბერში ჩატარებული გამოკითხვა სულ 2,068 დასრულებულ ინტერვიუს მოიცავს. საშუალო ცდომილების ზღვარი კვლევაში +/- 2,2 პროცენტია.