გაერო-ს გენერალური ასამბლეა კენჭს უყრის რეზოლუციას, რომელიც ღაზაში ცეცხლის შეწყვეტას მოითხოვს

გაერო-ს გენერალური ასამბლეა დღეს კენჭს უყრის იურიდიულად არასავალდებულო რეზოლუციას, რომელიც ღაზაში ჰუმანიტარული მიზნით ცეცხლის დაუყოვნებლივ შეწყვეტას მოითხოვს.

„ფრანს-პრესის“ ინფორმაციით, აღნიშნული რეზოლუციის პროექტის ტექსტი მეტწილად ასახავს რეზოლუციის შინაარს, რომელსაც შეერთებულმა შტატებმა, გაერო-ს უშიშროების საბჭოს ხუთი მუდმივი წევრიდან ერთ-ერთმა, პარასკევს ვეტო დაადო. აშშ-ის ამ ნაბიჯის შემდეგ არაბულმა ქვეყნებმა გენერალური ასამბლეის სპეციალური სესიის ჩატარება მოითხოვეს.

უშიშროების საბჭოს რეზოლუციებისგან განსხვავებით, გენერალური ასამბლეის რეზოლუციები იურიდიულად სავალდებულო არ არის, მაგრამ გაერო-ს პრესსპიკერმა განაცხადა, რომ ასევე ძალიან მნიშვნელოვანია ასამბლეის გზავნილები და რომ ის მსოფლიოს აზრს ასახავს.