საქართველოს ფინანსთა მინისტრ ლაშა ხუციშვილის განცხადებით, 2024 წელს გარემოს დაცვის მიმართულებაზე 650 მლნ ლარზე მეტი დაიხარჯება.

მისივე თქმით, მუნიციპალური გარემოსდაცვითი პროგრამებისათვის 450 მლნ ლარი დაიხარჯება.

„აღნიშნული დაფინანსების ფარგლებში, მათ შორის, გათვალისწინებულია: გარემოს ეროვნული სააგენტოს ბიუჯეტის დაფინანსების გასამმაგება;

ადრეული გაფრთხილებისა და პრევენციის შესაძლებლობების გაძლიერების მიზნით, დაგეგმილია დამატებითი მეტეოროლოგიური სადგურების შეძენა-მონტაჟი; მყინვარულ ხეობებში შესაძლო ჰიდრომეტეოროლოგიური და გეოლოგიური საფრთხეების დეტალური შეფასება და ქვეყნის მასშტაბით მსხვილი მეწყრული უბნების გეოლოგიური კვლევა და თანამედროვე მონიტორინგის სისტემის ინსტალირება (24 მლნ ლარი);

გარემოსდაცვითი ზედამხედველობის ღონისძიებების დაფინანსება - 29 მლნ ლარით;

სატყეო სისტემების მართვისთვის - 35 მლნ ლარი;

დაცული ტერიტორიების მართვისთვის - 23 მლნ ლარზე მეტი. გადამუშავებულ ვარიანტთან შედარებით, პროგრამისთვის დამატებით გამოიყო 3,0 მლნ ლარი. აღნიშნული თანხა წარმოადგენს ბიომრავალფეროვნების პროგრამის ხელშეწყობისთვის გერმანიის მიერ გამოყოფილ გრანტს და მის თანადაფინანსებას;

მყარი ნარჩენების მართვისთვის - 88 მლნ ლარი”, - განაცხადა ლაშას ხუციშვილმა.