გერმანიის შინაგან საქმეთა ფედერალური მინისტრის, ნენსი ფეზერის ორდღიანი ოფიციალური ვიზიტი საქართველოში დასრულდა.

ამის შესახებ ინფორმაციას შსს ავრცელებს.

მათივე ცნობით, ნენსი ფეზერი დელეგაციის წევრებთან ერთად შოთა რუსთაველის სახელობის თბილისის საერთაშორისო აეროპორტიდან შინაგან საქმეთა მინისტრმა, ვახტანგ გომელაურმა და საქართველოს საგანგებო და სრულუფლებიანმა ელჩმა გერმანიის ფედერალურ რესპუბლიკაში, ლევან იზორიამ გააცილეს.

ინფორმაციის თანახმად, ვიზიტის ფარგლებში, ნენსი ფეზერმა შეხვედრები გამართა საქართველოს პრემიერ-მინისტრ, ირაკლი ღარიბაშვილთან და შინაგან საქმეთა მინისტრთან - ვახტანგ გომელაურთან.

„გერმანიის და საქართველოს შინაგან საქმეთა მინისტრების შეხვედრის ფარგლებში ხელი მოეწერა საქართველოს მთავრობასა და გერმანიის ფედერაციული რესპუბლიკის მთავრობას შორის მიგრაციისა და მობილობის შესახებ შეთანხმებას. შეთანხმება მიზნად ისახავს შრომითი მიგრაციისა და განათლების მიმართულებით საქართველოსა და გერმანიის ფედერაციულ რესპუბლიკას შორის თანამშრომლობის გაძლიერებას.

შეხვედრის დასრულების შემდეგ, ვახტანგ გომელაურმა და ნენსი ფეზერმა ერთობლივი ბრიფინგი გამართეს, სადაც ქართველი და გერმანელი ჟურნალისტების მიერ დასმულ კითხვებს უპასუხეს“, - აღნიშნულია უწყების მიერ გავრცელებულ ინფორმაციაში.