ქალაქ თბილისის მერიის ჯანდაცვის და სოციალური მომსახურების საქალაქო სამსახურის უფროსის, გელა ჩივიაშვილის განცხადებით, 2024 წლის 1-ელი იანვრიდან „ძუძუს კიბოს სამკურნალო მედიკამენტების“ პროგრამის ფარგლებში ბენეფიციარები 4 ძირითადი მედიკამენტზე მიიღებენ 100%-ით დაფინანსებას.

მისივე თქმით, აღნიშნული მედიკამენტებია - „ჰერცეპტინი“, „პერტუზუმაბი“ („პერჯეტა“), „ფესგო“, „ლაპატინიბი“.

„დღევანდელი გადაწყვეტილებით, ცვლილება შევიდა „ძუძუს კიბოს მედიკამენტების დაფინანსების“ პროგრამაში. ამ პროგრამის ფარგლებში ფინანსდება 4 ძირითადი მედიკამენტი. ეს არის: „ჰერცეპტინი“, „პერტუზუმაბი“ („პერჯეტა“), „ფესგო“, „ლაპატინიბი“.

შესაბამისად, ყველა ადამიანს დაუფინანსდება 1-ელი იანვრიდან 100%-ით. ამ შემთხვევაში თითოეულ პაციენტი საჭიროებიდან გამომდინარე, რაც „გაიდლაინებით“ არის დადგენილი, მას უფინანსდება მთლიანად 18 გადასხმა, როგორც ადრეულ სტადიაზე, ასევე მეტასტაზურ შემთხვევაში ანუ ორივე შემთხვევაში ხდება 100%-ით დაფინანსება საჭიროებიდან გამომდინარე მედიკამენტების.

დღემდე სოციალურად დაუცველებს უფინანსდებოდათ 100%-ით, ხოლო ყველა სხვა დანარჩენს უფინანსდებოდა 80%-ი, ხოლო 1-ელი იანვრიდან, 100%-ით მოხდება მათი დაფინანსება, იგივე პროგრამის ბიუჯეტის ფარგლებში, ვინაიდან მოხდა ფასების კორექტირება, შემცირება მედიკამენტის ფასების და ამან საშუალება მოგვცა, რომ ჩვენ 100%-მდე აგვეწია, ეს დაფინანსება.

ამ პროგრამით 2023 წელს 200-მდე ბენეფიციარი სარგებლობდა. იქიდან გამომდინარე, როგორც იქნება დანიშნულება საჭიროებიდან გამომდინარე, რა თქმა უნდა, გაგრძელდება 2024 წელსაც“, - განაცხადა გელა ჩივიაშვილმა.