„ნაციონალური მოძრაობის" რეგიონული მდივნის გიორგი ბოტკოველის შეფასებით, ვენეციის კომისიის დასკვნა საკმაოდ კრიტიკულია. როგორც მან ჟურნალისტებთან განმარტა, ეს დასკვნა აჩვენებს, რომ ანტიკორუფციული ბიუროს უფროსი ღარიბაშვილმა საკუთარი დავალებების შესასრულებლად დანიშნა.

„დასკვნა, რაც ვენეციის კომისიამ დადო, ამაზე ჩვენ და სრულიად ოპოზიცია საუბრობდა. ანტიკორუფციული ბიურო შეიქმნა ღარიბაშვილის პორტფელში და ჯიბეში, ამას დადასტურება არ სჭირდება. არ ჩატარებულა არანაირი კონკურსი, არავითარი რეალური საქმიანობა არ გაწეულა ამ მიმართულებით, ღარიბაშვილმა დანიშნა ის ადამიანი, ვინც მისი დავალებების შემსრულებელი იქნება. ასევე, ივანიშვილის ყველა დავალების შემსრულებელი. რასაც ვხედავთ, რეალური გადადგმული ნაბიჯი ანტიკორუფციული ბიუროს მხრიდან არ დაგვინახავს. მხოლოდ ვხედავთ დაფინანსებულ სტატუსებს ვიზიტებთან დაკავშირებით. რეალურად, თუ ქვეყანაში ანტიკორუფციულ ბიუროს საქმე არ აქვს, ეს კიდევ უფრო კატასტროფაა. თუ ქვეყანაში ყველაზე მეტად არის რამე გამეფებული, ეს არის კორუფცია, რომელშიც უმაღლესი თანამდებობის პირები არიან ჩართული", - განაცხადა ბოტკოველმა.

ცნობისთვის, ვენეციის კომისია აცხადებს, რომ არსებული ინსტიტუციური პროექტი არ ითვალისწინებს ანტიკორუფციული ბიუროს დამოუკიდებლობის საკმარის ხარისხს და მიიჩნევს, რომ პოლიტიკური პარტიების დაფინანსების ზედამხედველობისა და მაღალი დონის თანამდებობის პირების ქონებრივი და ინტერესების დეკლარაციების მონიტორინგთან დაკავშირებით მისი კომპეტენციები კანონში დამატებით გარანტიების შეტანას მოითხოვს.