ბათუმში ძლიერმა ქარმა პრობლემები შექმნა - მოგლეჯილია ხეები, დაზიანებულია კორპუსების სახურავები და ელექტროგადამცემი ხაზები
ბათუმში ძლიერმა ქარმა პრობლემები შექმნა.
ქარის შედეგად დაზიანებულია საცხოვრებელი კორპუსების სახურავები, მოგლეჯილია ხეები, ავტოსადგომზე ხეები ავტომობილებს დაეცა. წინასწარი ინფორმაციით, რამდენიმე მანქანაა დაზიანებული.
მთელი ღამის განმავლობაში, ძლიერი ქარის გამო, ბულვარში, პარკსა და სკვერებში დაზიანდა ინფრასტრუქტურაც.
ძლიერმა ქარმა ბათუმში შოთა რუსთაველის სახელობის სახელმწიფო უნივერსიტეტის შენობას სახურავი მთლიანად გადახადა, რამაც მიმდებარე ქუჩაზე სატრანსპორტო მოძრაობა შეაფერხა.
ადგილზე შესაბამისი სამსახურები იმყოფებიან და გაწმენდით სამუშაოებს ატარებენ.
“ძლიერი ქარის შედეგად მრავალბინიანი სახლების სახურავები, თუნუქის შეფუთვები, ელექტროგადამცემი და გარეგანათების ბოძები, მრავალწლოვანი ხეები და მუნიციპალური ავტობუსის გაჩერებები დაზიანდა. მიმდინარეობს სალიკვიდაციო ღონისძიებები, ოპერატიულად ხორციელდება წაქცეული ხეებისგან გზების გათავისუფლების სამუშაოები. საგანგებო რეჟიმში მუშაობას განაგრძობენ მერიის სამსახურები”, - აცხადებენ ბათუმის მერიაში.
