იერუსალიმის სომხურ კვარტალში შეკრებილებს 30-მდე ადამიანი თავს დაესხა. ამის შესახებ ინფორმაციას სომხური გამოცემა news.am ავრცელებს.

მათი ცნობით, შავ სამოსში გამოწყობილი და შენიღბული დაახლოებით 30 ადამიანი იერუსალიმის სომხურ კვარტალში შეკრებილ სომხებს თავს დაესხა. გამოცემის ცნობით, თავდამსხმელები კეტებით, ცრემლსადენი გაზითა და სხვა საშუალებებით იყვნენ შეიარაღებული, ხოლო მათი მიზანი ტერიტორიიდან სომხების გაძევება და დაშინება იყო.

წინასწარი ინფორმაციით, თავდამსხმელებმა ქვების სროლა დაიწყეს, რის შემდეგაც შეკრებილი სომეხი ახალგაზრდობა და სასულიერო პირები მათ წინააღმდეგ ჩხუბში ჩაერთნენ, ვიდრე ადგილზე პოლიცია არ მოვიდა.

გამოცემის ცნობით, შედეგად ორი პირი დააკავეს.

იერუსალიმში სომხური საპატრიარქოს ცნობით, თავდასხმის შედეგად სომხური თეოლოგიური აკადემიის რამდენიმე სასულიერო პირი და სტუდენტი, ასევე რამდენიმე ადგილობრივი სომეხი დაშავდა.