თბილისის საკრებულოს თავმჯდომარემ, გიორგი ტყემალაძემ და საკრებულოს წევრებმა ალილოს ტრადიციულ მსვლელობაში მონაწილეობა მიიღეს.

დედაქალაქის წარმომადგენლობითი ორგანოს წევრებმა თავისუფლების მოედანზე, მეალილოებს ქრისტესშობა მიულოცეს და საშობაო ნობათი გადასცეს.

ალილოს მსვლელობისას თბილისის საკრებულოს თავმჯდომარემ, გიორგი ტყემალაძემ, სრულიად საქართველოს მოსახლეობას შობის დღესასწაული მიულოცა და მშვიდობა უსურვა.

მისი თქმით, ალილო არის ის ძირძველი ტრადიცია, რომელსაც ქართველი ხალხი ყოველწლიურად ტრადიციული მსვლელობით აღნიშნავს.

„მინდა სრულიად საქართველოს შობის დღესასწაული მივულოცო. დღევანდელი დღე არის სიკეთის და სიხარულის მომტანი. წლევანდელი წელი მართლაც განსაკუთრებული იქნება ჩვენი ქვეყნისთვის და მინდა ჩვენს ქვეყანას გამთლიანება, ერთობა ვუსურვო. დიდი სიხარულით და ამაღლებული განწყობით ვუერთდებით ალილოს მსვლელობას, რომელიც ჩვენი უწმინდესი და უნეტარესის, საქართველოს პატრიარქის ლოცვა-კურთხევით მიმდინარეობს. ეს არის სიმბოლო ჩვენი ერთიანობის და თანადგომის. კიდევ ერთხელ ვულოცავ ჩვენს თანამოქალაქეებს და სრულიად საქართველოს“, - განაცხადა გიორგი ტყემალაძემ.

ქრისტესშობის დღესასწაულზე ალილოს მსვლელობა პირველი რესპუბლიკის მოედნიდან დაიწყო. მეალილოებმა რუსთაველის გამზირისა და თავისუფლების მოედნის გავლით მსვლელობა ლოცვით და გალობით ყოვლადწმინდა სამების ტაძარში დაასრულეს.

ალილოს მონაწილეებს გზადაგზა ტკბილეულსა და საჩუქრებს მოსახლეობაც გადასცემდა. შემოწირულობა, რომელიც ალილოს მსვლელობისას შეგროვდა, ყოვლადწმინდა სამების ტაძრიდან ბავშვთა სახლებში, უმწეოთა თავშესაფრებსა და პენიტენციურ დაწესებულებებში გადანაწილდება.