მთავრობა ოჯახებს, ვისაც სამი და მეტი შვილი ჰყავთ და მძიმე საცხოვრებელ პირობებში არიან ან საცხოვრებელი არ აქვთ, 2024 და 2025 წლებში, საცხოვრებელი სახლებით უზრუნველყოფს.

შესაბამისი გადაწყვეტილების შესახებ მთავრობის სხდომის შემდეგ გამართულ პრესკონფერენციაზე ჯანდაცვის მინისტრმა ზურაბ აზარაშვილმა ისაუბრა.

მისი თქმით, აღნიშნული ოჯახების რაოდენობა ათასამდეა.

„50 მილიონია ბიუჯეტი. დევნილთა სააგენტოში შეიქმნება შესაბამისი კომისია და ამ კომისიის გადაწყვეტილების საფუძველზე ეს ოჯახები საცხოვრებლით დაკმაყოფილდებიან”,- განაცხადა ზურაბ აზარაშვილმა.

რაც შეეხება აღნიშნული პროგრამის განხორციელების ფორმას, აზარაშვილი ამბობს, რომ სამინისტროს აქვს შესაბამისი ოჯახების ბაზა, თუმცა მუნიციპალური ცენტრებისთვის განაცხადით მიმართვა თავად მოქალაქეებსაც შეუძლიათ.

„ასეთი ოჯახები განაცხადებს გააკეთებენ მუნიციპალურ ცენტრებში. გვაქვს ინფორმაცია ასეთი ოჯახები რომელ მუნიციპალიტეტებში არიან. ჩვენ თვითონაც მივმართავთ და თვითონაც შეეძლებათ განაცხადით მომართვა”,- განაცხადა აზარაშვილმა.

რაც შეეხება კითხვას, ხომ არ უკავშირდება აღნიშნული პროგრამის განხორციელება საარჩევნო წელს, აზარაშვილი ამბობს, რომ საკითხზე გადაწყვეტილება აქამდე იყო მიღებული და მას საარჩევნო წელთან ან ადმინისტრაციული რესურსის გამოყენებასთან კავშირი არ აქვს.

„რადგან საარჩევნო წელია, არ ნიშნავს, რომ არაფერი უნდა გავაკეთოთ. ეს გადაწყვეტილება ფორმალურად გაფორმდა წლის პირველ მთავრობის სხდომაზე, თუმცა მთელი წინა წლის განმავლობაში მიდიოდა ამ პროექტზე მუშაობა. გადაწყვეტილება გაცილებით ადრე იყო მიღებული ახლა მხოლოდ გაფორმდა.

არანაირი კავშირი საარჩევნო წელთან არ აქვს და მითუმეტეს რა კავშირი აქვს ადმინისტრაციული რესურსის გამოყენებასთან.

თანხები გამოიყოფა კონკრეტული მიზნობრიობით”,- განაცხადა ზურაბ აზარაშვილმა.