იტალიის პარლამენტის ქვედა პალატამ მხარი დაუჭირა რეზოლუციას, რომელიც უკრაინისთვის სამხედრო მხარდაჭერის გაგრძელებას მოითხოვს. ამ გადაწყვეტილების სასარგებლოდ ხმა 195-მა დეპუტატმა მისცა, 50 წინააღმდეგი იყო, 55-მა კი თავი შეიკავა.

მედიის ინფორმაციით, პარლამენტის მიერ დამტკიცებული რეზოლუცია მოითხოვს, იტალიამ გააგრძელოს უკრაინის მხარდაჭერა მისი ვალდებულებების შესაბამისად და იმის მიხედვით, რაც შეთანხმებული იქნება ნატო-სა და ევროკავშირის ფარგლებში, საერთაშორისო ფორუმებზე, რომლის წევრი იტალიაცაა და უკრაინის სამთავრობო უწყებების მიერ. საუბარია დახმარებაზე მათ შორის სამხედრო სატრანსპორტო საშუალებების, მასალებისა და აღჭურვილობის გადაცემის გზით.

„უკრაინის მიმართ ჩვენი მხარდაჭერა ძლიერი და აბსოლუტურად უცვლელი რჩება. ჩვენ ჯერ კიდევ დიდი გზა გვაქვს გასავლელი უკრაინასთან ერთად, მაგრამ დრამატული სტრატეგიული და პოლიტიკური შეცდომა იქნება ახლა ნაბიჯის უკან გადადგმა. ჩვენი მხარდაჭერა უნდა გაგრძელდეს მანამ, სანამ რუსული თავდასხმები არ შეჩერდება", - განაცხადა იტალიის თავდაცვის მინისტრმა, გვიდო კროსეტომ პარლამენტში სიტყვით გამოსვლისას.

მისი თქმით, ცოტა ხნის წინ იტალიამ მწვანე შუქი აუნთო კიევში აღჭურვილობის, მასალებისა და სისტემების მერვე ტრანშის გაგზავნას.