საარჩევნო ბარიერთან დაკავშირებით დაახლოებით, წელიწადნახევრის წინ გაკეთებულ შეთავაზებაზე ოპოზიციის მხრიდან ნულოვანი რეაქცია იყო - შესაბამისად, საკითხი დღის წესრიგიდან გაქრა, - ასე უპასუხა უმრავლესობის დეპუტატმა ბექა დავითულიანმა საარჩევნო ბარიერის დაწევის თაობაზე დასმულ კითხვას.

დავითულიანის თქმით, დღეს ბარიერის საკითხი აქტუალური არ არის.

„საარჩევნო ბარიერთან დაკავშირებით, დაახლოებით, წელიწადნახევრის წინ შეთავაზება გაკეთებული იყო ოპოზიციის მიმართ, ოპოზიციის მხრიდან ნულოვანი რეაქცია იყო. შესაბამისად, საკითხი დღის წესრიგიდან გაქრა და აღნიშნული საკითხი დღის წესრიგში არ დგას. ბარიერის საკითხის დღეს ჩვენთვის აქტუალური არ არის - გეგმაში არაფერი არ გვაქვს“, - განაცხადა დავითულიანმა ჟურნალისტებთან.

ცნობისთვის, პარლამენტმა 2021 წლის სექტემბერში, პირველი მოსმენით - 126 ხმით, ერთხმად, საკონსტიტუციო ცვლილებები დაამტკიცა, რომელიც საპარლამენტო არჩევნების 2%-იანი ბარიერით ჩატარებას ითვალისწინებს. საკონსტიტუციო ცვლილებას მხარი ოპოზიციამ დაუჭირა, თუმცა ამის შემდეგ განხილვის პროცესი აღარ გაგრძელდა.